ড্ৰাগছৰ গোচৰত অভিযুক্ত আৰিয়ানলৈ বৃহত্‍ সকাহ…

নতুন দিল্লীঃ মুম্বাই ড্ৰাগছ কাণ্ডই জোঁকাৰি গৈছিল বলীউড। প্ৰমোদতৰীৰ পৰা মুম্বাই আৰক্ষীয়ে আটক কৰিছিল বলীউড বাদশ্বাহ শ্বাহৰূখ পুত্ৰ আৰিয়ানক। আৰিয়ানৰ জামিনৰ আৱেদন কৰাৰ পাছতো বিফল মনোৰথ লৈ উভতিছিল কিং খানে। শ্বাহৰূখৰ তত্‍পৰতাতে আৰিয়ান আৰু তেওঁৰ দুই বন্ধু আৰবাজ মাৰ্চেণ্ট-মুনমুন ধামেচাক চলিত বৰ্ষৰ ২৮ অক্টোবৰত আদালতে জামিনৰ শুনানি দিছিল। অৱশেষত, মুম্বাই উচ্চ ন্যায়ালয়ে তিনিওজন অভিযুক্তক ১৩টা চৰ্তৰ ওপৰত ভিত্তি কৰি ২৯ অক্টোবৰত প্ৰদান কৰিছিল জামিন।

জামিনৰ চৰ্ত হিচাপে প্ৰতি শুক্ৰবাৰে এনচিবি কাৰ্যালয়ত উপস্থিত হোৱাটো একপ্ৰকাৰ বাধ্যতামূলক আছিল। এতিয়া, মুম্বাই উচ্চ ন্যায়ালয়ে আৰিয়ান খানক প্ৰতি শুক্ৰবাৰে এনচিবি কাৰ্যালয়ত হাজিৰ হোৱাৰ নিৰ্দেশ দিয়া হৈছিল। কিন্তু বলীউড তনয়ে পৰৱৰ্তী সময়ত প্ৰমোদতাৰীৰ ড্ৰাগছ গোচৰৰ বিচাৰপতি ন্যায়াধীশ নীতিন চাম্বৰেই প্ৰদান কৰা জামিনৰ চৰ্তৰ সংশোধনী বিচাৰি কৰিছিল আৱেদন। মুম্বাই উচ্চ ন্যায়ালয়ৰো কাষ চাপিছিল আৰিয়ানে। অৱশেষত, মুম্বাই উচ্চ ন্যায়ালয়ে আৰিয়ানক দিলে ৰেহাই।এতিয়াৰে পৰা আৰু প্ৰতি শুকুৰবাৰে এনচিবিৰ কাৰ্যালয়ত উপস্থিত হ’ল নালাগে আৰিয়ানে।