ডিজিটেল ডেস্কঃ দেশৰ বহুমূত্র (ডায়েবিটিছ) ৰোগীৰ বাবে ভাল খবৰ? এম্পাগ্লিফ্ল'জিন নামৰ ঔষধবিধৰ দাম অচিৰেই বৃহৎ হাৰত হ্রাস পাব। বর্তমান বজাৰত এই ঔষধবিধৰ প্ৰতিটো টেবলেটৰ দাম ৬০ টকা, কিন্তু অহা ১১ মাৰ্চৰ পৰা ইয়াৰ দাম ৯ টকালৈ হ্রাস পোৱাৰ সম্ভাৱনা আছে।
উল্লেখযোগ্য যে এই ঔষধবিধ প্রস্তুত কৰে জাৰ্মানিৰ কোম্পানী বুগৰিংগাৰ ইংগেতহীমে। অহা ১১ মাৰ্চত এই ঔষধবিধৰ কোম্পানীটোৰ পেটেণ্টৰ ম্যাদ অন্ত পৰিব। ইয়াৰ পাছত এই ঔষধবিধক ভাৰতীয় কোম্পানীসমূহে নিজৰ ব্ৰেণ্ডত বজাৰলৈ উলিয়াই দিয়াৰ প্ৰস্তুতি চলাইছে।
এই ভাৰতীয় কোম্পানীবোৰৰ ভিতৰত মেনকাইণ্ড ফার্মা, টাৰেণ্ট, এলকেম, ড° ৰেড্ডী আৰু লিউপিনো আছে। মেনকাইণ্ডে জার্মান কোম্পানীটোৰ তুলনাত প্রায় ৯০% কম দামত এই ঔষধবিধ বজাৰলৈ উলিয়াই দিয়াৰ প্ৰস্তুতি চলাইছে। টাইপ-২ বহুমূত্র ৰোগীয়ে সেৱন কৰা এই ঔষধবিধৰ জেনেৰিক সংস্কৰণ ভাৰতীয় কোম্পানীসমূহে প্রতিটো টেবলেটত ৯-১৪ টকা দৰত বজাৰলৈ উলিয়াই দিব।
বিশেষজ্ঞসকলে প্রকাশ কৰা মতে, এই ঔষধবিধ হৃৎপিণ্ড আৰু কিডনীৰ বিকাৰ প্ৰতিৰোধ কৰাত ব্যৱহাৰ কৰা হয়। এই ঔষধবিধৰ দাম হ্রাস পালে দেশৰ লাখ লাখ ৰোগী উপকৃত হ'ব। উল্লেখযোগ্য যে বর্তমান ভাৰতত ১০.১ কোটিতকৈ অধিক লোক বহুমূত্র ৰোগত ভুগি আছে।
উৎসঃ দৈনিক জনমভূমি
Continue Reading
