ৰঙাপৰাত মৃত পশুধন কাটি বিক্ৰীৰ অভিসন্ধি! অভিযুক্তক ক্ষুব্ধ ৰাইজৰ উত্তম-মধ্যম

ডিজিটেল ডেস্ক: শোণিতপুৰৰ ৰঙাপৰা অঞ্চলত সংঘটিত হোৱা এক ঘটনাই সমগ্ৰ অঞ্চলটোত চাঞ্চল্যৰ সৃষ্টি হয়। এজন ব্যক্তিয়ে এটা মৃত গোধন পুতি থোৱাৰ বিপৰীতে অতি গোপনে টুকুৰা টুকুৰকৈ কাটি বিক্ৰী কৰাৰ চেষ্টা চলাইছিল। 

বৰজুলি চাহ বাগিচাৰ অন্তৰ্গত ৰঙাপৰাৰ ৩ নং শ্ৰমিক লাইনৰ বাসিন্দা নিপেন ভূঁঞৰে মৃত গোধনটো পুতি থ'ব বুলি স্থানীয় ৰাইজক আশ্বাস দিছিল। কিন্তু পিছত তেওঁ উক্ত মৃত পশুধনটো টুকুৰা টুকুৰকৈ কাটি বিক্ৰী কৰাৰ যো-জা চলাইছিল। ইফালে ঘটনাৰ খবৰ পাই স্থানীয় ৰাইজ তৎক্ষণাৎ ঘটনাস্থলীত উপস্থিত হয়। 

ভূঁঞৰে মৃত গোধনটো কাটি পেলোৱাৰ দৃশ্য প্ৰত্যক্ষ কৰাৰ পিছতে একাংশ ৰাইজে ধৰি লৈ উত্তম-মধ্যম শোধায়। উল্লেখ্য যে হিন্দু সমাজত গোধনক পূজ্য হিচাপে গণ্য কৰা হয়। যাৰ পৰিপ্ৰেক্ষিতত স্থানীয় লোকে এই কাৰ্যৰ তীব্ৰ ধিক্কাৰ জনায় আৰু ৰাইজে নিপেন ভূঁঞৰৰ বিৰুদ্ধে আৰক্ষীক কঠোৰ ব্যৱস্থা গ্ৰহণ কৰাৰ দাবী জনায়।