ডিমৌত ভয়ংকৰ পথ দুৰ্ঘটনা; এজন লোকৰ মুণ্ড ছিঙি ছিটিকি পৰিল দূৰৈত, ২জন আহত

ডিজিটেল ডেস্ক: ডিমৌ হাৰিপৰা আলিত সংঘটিত হৈছে এক ভয়ংকৰ পথ দুৰ্ঘটনা। ডিমৌ আৰক্ষী থানাৰ অন্তৰ্গত কলিয়াপানীত মঙলবাৰে নিশা প্ৰায় ১০.৩০ বজাত সংঘটিত হয় ভয়ংকৰ পথ দুৰ্ঘটনাটো। এখন অচিনাক্ত বাহন, এখন নম্বৰপ্লেট বিহীন বেটাৰীচালিত ৰিক্সা আৰু AS-04-AH-6210 নম্বৰৰ এখন মটৰচাইকেলৰ মাজত সংঘটিত এই দুৰ্ঘটনা। 

দুৰ্ঘটনাটোত মটৰচাইকেলখনৰ এজন আৰোহী থিতাতে নিহত হোৱাৰ লগতে আৰু দুজন লোক গুৰুতৰভাৱে আহত হয়। দুৰ্ঘটনাটো ইমানেই ভয়ংকৰ আছিল যে, দুৰ্ঘটনাৰ ফলত আৰোহীজনৰ মুণ্ড ছিঙি প্ৰায় বিশ মিটাৰ ছিটিকি পৰিছিল।

জানিবপৰা অনুসৰি, ডিমৌ পৰা আঠাবাৰী দিশলৈ তীব্ৰ বেগেৰে গৈ প্ৰথমে বিপৰীত দিশৰ পৰা আহি থকা ৰিক্সাখনত খুন্দা মাৰি আন এখন অচিনাকি বাহনত প্ৰচণ্ড জোৰেৰে খুন্দা মৰাৰ ফলতেই উক্ত দুৰ্ঘটনাটো সংঘটিত হয়। ইফালে, দুৰ্ঘটনাটো সংঘটিত হোৱাৰ পাছতে অচিনাকী বাহনখন পলাই যাবলৈ সক্ষম হয় আৰু পথৰ কাষত থকা দ খাৱৈত ৰিক্সাখন আৰু পথৰ ওপৰত মটৰচাইকেলখন পৰি আছিল। 

স্থানীয় ৰাইজে দুৰ্ঘটনাটো প্রত্যক্ষ কৰি বেটাৰীচালিত ৰিক্সা বা কোনো অচিনাক্ত বাহনৰ লগত মটৰচাইকেলখন খুন্দা খাই এনে ভয়ংকৰ দুৰ্ঘটনা সংঘটিত হ’ব পাৰেনে বুলিও প্ৰত্যক্ষদৰ্শী সকলৰ মাজত প্ৰশ্ন উদয় হৈছে। আনহাতে, এই দুৰ্ঘটনাটোত কৰুণ মৃত্যুক আঁকোৱালি লোৱা আৰোহীজনৰ পৰিচয় বৰ্তমানলৈকে জানিব পৰা হোৱা নাই। বৰ্তমান ঘটনাস্থলীত ডিমৌ আৰক্ষী উপস্থিত হৈ মৃতদেহ আৰু মুণ্ড উদ্ধাৰ কৰাৰ লগতে দুৰ্ঘটনাটোত আহত দুজনক ডিমৌ আদৰ্শ চিকিৎসালয়ত ভৰ্তি কৰে৷ 

এই ভয়ংকৰ দুৰ্ঘটনাটোৰ সন্দৰ্ভত তদন্ত আৰম্ভ কৰিছে আৰক্ষীয়ে। ইফালে, আৰক্ষীৰ তদন্তৰ পাছতহে এইয়া প্ৰকৃত দুৰ্ঘটনা নে হত্যা কৰি দুৰ্ঘটনাৰ ৰূপ দিছিল সেয়া পোহৰলৈ আহিব।