দেশৰ বিৰুদ্ধে যুদ্ধ কৰিব বিচাৰিছিল ‘এলগাৰ পৰিষদ গোচৰ’ৰ অভিযুক্তই!

মু্ম্বাই : দেশৰ বিৰুদ্ধে যুদ্ধ আৰম্ভ কৰিব বিচাৰিছিল ‘এলগাৰ পৰিষদ-মাওবাদীৰে সম্পৰ্ক’ৰ গোচৰত অভিযুক্তই। এই গুৰুতৰ অভিযোগ উত্থাপন কৰিছে এই গোচৰৰ তদন্ত কৰি থকা ৰাষ্ট্ৰীয় অনুসন্ধানকাৰী সংস্থা চমুকৈ নিয়াই। নিয়াই মুম্বাইৰ এখন বিশেষ আদালতত দাখিল কৰা খচৰা অভিযোগনামাত এনে বিস্ফোৰক অভিযোগ উত্থাপন কৰিছে। এই অভিযুক্তসকলে তেওঁলোকৰ নিজা চৰকাৰ প্ৰতিষ্ঠা কৰিব বিচাৰিছিল আৰু ৰাষ্ট্ৰৰ বিৰুদ্ধে যুদ্ধ ঘোষণা কৰিব বিচাৰিছিল বুলি উল্লেখ কৰা হয় এই অভিযোগনামাত।

এই মাহৰ আৰম্ভণিতে নিয়াই এই খচৰা দাখিল কৰিছিল আৰু সোমবাৰে সেই খচৰাৰ প্ৰকাশ কৰা হয়। এই খচৰাখনত ১৫জন অভিযুক্তৰ বিৰুদ্ধে ১৭টাকৈ অভিযোগ অনা হৈছে। এইএপিএ, আইপিচিৰ বিভিন্ন ধাৰাত ৰুজু কৰা হৈছে গোচৰ। মন কৰিবলগীয়া যে, অভিযুক্তৰ তালিকাত দেশৰ কেইবাগৰাকীও বিশিষ্ট সমাজকৰ্মী, মানৱ অধিকাৰ কৰ্মী আৰু নাগৰিক স্বাধীনতাৰ হকে কাম কৰা সংগ্ৰামীও আছে। নিয়াই এইসকল অভিযুক্ত নিষিদ্ধ ঘোষিত চিপিআই (মাওবাদী) গোটৰ সক্ৰিয় সদস্য বুলিও অভিযোগ উত্থাপন কৰিছে।

সুধা ভৰদ্বাজ, ভাৰ্নন গোনছেলভ, ৱাৰাৱাৰা ৰাও, হেনী বাবু, আনন্দ তেলতুম্বে, ছোমা সেন, গৌতম নৱলেখাকে ধৰি দেশৰ ভালেমান বিশিষ্ট লোকক এই গুৰুতৰ গোচৰত অভিযুক্ত কৰি দীৰ্ঘদিনে কাৰাৰুদ্ধ কৰি ৰাখিছে নিয়াই। নিয়াৰ মূল অভিযোগ হৈছে যে, এইসকল লোকে গণ অভ্যুত্থান আৰু সশস্ত্ৰ সংগ্ৰামৰ জৰিয়তে ‘জনতা চৰকাৰ’ প্ৰতিষ্ঠা কৰিব বিচাৰিছিল আৰু ৰাজ্যখনৰ ক্ষমতা হস্তগত কৰিব বিচাৰিছিল। নিয়াই লগতে অভিযোগ আনিছে যে, তেওঁলোকে ভাৰত তথা মহাৰাষ্ট্ৰ চৰকাৰৰ বিৰুদ্ধে যুদ্ধ ঘোষণা কৰাৰ পৰিকল্পনা কৰিছিল।