ডিজিটেল ডেস্কঃ প্ৰচণ্ড বৰষুণৰ ফলত ভাঙিল ঘাইপথৰ এটা অংশ। ফলত ঘাইপথেৰে গৈ থকা ২৩ খনকৈ গাড়ী গাঁতত সোমাই পৰে। এই ঘটনাত ৩৬ জনকৈ লোকে মৃত্যুক সাবটে। এই কৰুণ ঘটনা চীনৰ মেইঝৌত সংঘটিত হৈছে।
মেইঝৌ চহৰ প্ৰশাসনে জনোৱা মতে, বুধবাৰে পুৱা প্ৰায় ২ বজাত ঘাইপথটোৰ ১৭.৯ মিটাৰ দৈৰ্ঘ্যৰ এটা অংশ ভাঙি ২৩খন বাহন গাঁতত সোমাই পৰে। চৰকাৰী বিবৃতি অনুসৰি এই দুৰ্ঘটনাত ৩৬ জন লোক নিহত হৈছে। প্ৰা্য় ৩০ জন আহত হৈছে।
যোৱা ২ সপ্তাহ ধৰি গুৱাংডং প্ৰদেশৰ কিছু অংশত বৰষুণ আৰু বানপানীৰ লগতে শিলাবৃষ্টি হৈছে।
প্ৰত্যক্ষদৰ্শীয়ে স্থানীয় সংবাদ মাধ্যমক জনোৱা মতে, তেওঁলোকে এটা বৃহৎ শব্দ শুনিছিল আৰু তাৰ পাচতে পথটো খহি পৰা দেখিছিল, য'ত বাহনবোৰ চলি আছিল। স্থানীয় সংবাদ মাধ্যমত ভিডিঅ' আৰু ফটোবোৰ প্ৰকাশ পাইছে। য'ত বাহনবোৰ জ্বলি যোৱা দেখা গৈছে। ৰাজপথৰ পৰা তললৈ যোৱা ঢালত ধ্বংসস্তুপত পৰিণত বাহনবোৰ পৰি থকা দেখা গৈছে।
উল্লেখ্য যে যোৱা সপ্তাহৰ শেষৰ ফালে প্ৰাদেশিক ৰাজধানী গুৱাংঝোত হোৱা ধুমুহাত ৫ জন লোকৰ মৃত্যু হৈছিল। ধুমুহাৰ ফলত ১৪০টাতকৈও অধিক অট্টালিকা ক্ষতিগ্ৰস্ত হয়। ধুমুহাৰ ফলত ৩৩ জন লোক আহত হোৱাৰ লগতে সমগ্ৰ অঞ্চলটোত বিদ্যুৎ অচল হৈ পৰে।
Continue Reading
