ডিজিটেল ডেস্ক: গুৱাহাটীৰ উলুবাৰীৰ বিলাস ইন হোটেলত সংঘটিত পাঁচজন লোকৰ চাঞ্চল্যকৰ হত্যাকাণ্ডৰ মূল অভিযুক্ত ঘনকান্ত গগৈ আৰক্ষীৰ এনকাউণ্টাৰত নিহত হৈছে। মঙলবাৰে পুৱতি নিশা শিৱসাগৰ জিলাত আৰক্ষীৰ জিম্মাৰ পৰা পলায়নৰ চেষ্টা চলাওঁতে আৰক্ষীৰ আত্মৰক্ষাৰ গুলীত নিহত হয় কুখ্যাত অভিযুক্তজন।
লাভ কৰা তথ্য অনুসৰি, মঙলবাৰে পুৱা প্ৰায় ৩:১০ বজাত শিৱসাগৰ আৰক্ষীৰ এটা দলে অভিযুক্ত ঘনকান্ত গগৈক লৈ গৈ থকা অৱস্থাত শিৱসাগৰৰ গৌৰীসাগৰ থানাধীন ৰংমন ধামৰ সমীপৰ ফুলপানীচিগা নামৰ স্থানত এই ঘটনা ঘটে।
আৰক্ষীয়ে জনোৱা মতে, অভিযুক্তৰ আক্ৰমণৰ বলি হৈ শিৱসাগৰ সদৰ থানাৰ উপ-পৰিদৰ্শক (SI) দেৱাশীষ শৰ্মা গুৰুতৰভাৱে আহত হয়। ঘনকান্তৰ গুলী উপ-পৰিদৰ্শকগৰাকীৰ ভৰিত লাগোতে আৰক্ষীৰ বাহনখনতো গুলীৰ আঘাত লাগে। পৰৱৰ্তী সময়ত পৰিস্থিতি নিয়ন্ত্ৰণলৈ আনিবলৈ আৰু আত্মৰক্ষাৰ বাবে আৰক্ষীয়ে গুলীচালনা কৰিবলৈ বাধ্য হয়, য'ত গুলীবিদ্ধ হৈ গুৰুতৰভাৱে আহত হয় ঘনকান্ত গগৈ।
আহত অৱস্থাত আৰক্ষীয়ে লগে লগে ঘনকান্তক চিকিৎসালয়লৈ লৈ যায় যদিও চিকিৎসালয় পোৱাৰ পূৰ্বেই তেওঁৰ মৃত্যু ঘটে। আনহাতে, আহত উপ-পৰিদৰ্শক দেৱাশীষ শৰ্মাক জয়সাগৰ চিকিৎসালয়ত ভৰ্তি কৰোৱা হৈছে আৰু বৰ্তমান তেওঁৰ অৱস্থা সংকটমুক্ত বুলি আৰক্ষী সূত্ৰে প্ৰকাশ পাইছে।
উল্লেখ্য যে, বীভৎস হত্যাকাণ্ডৰ মূল অভিযুক্ত আছিল ঘনকান্ত গগৈ। এই ঘটনাৰ পিছতে সমগ্ৰ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল আৰু অভিযুক্তক কঠোৰৰ পৰা কঠোৰতম শাস্তি প্ৰদানৰ দাবী উত্থাপন হৈছিল। শেহতীয়াকৈ আৰক্ষীৰ জিম্মাত থকা অৱস্থাত ঘটা এই এনকাউণ্টাৰৰ ঘটনাই সমগ্ৰ ৰাজ্যতে পুনৰ এক চাঞ্চল্যৰ সৃষ্টি কৰিছে।
Continue Reading
