ডিজিটেল ডেস্কঃ আধ্যাত্মিক পৰম্পৰাৰে উজ্জীৱিত হৈ পৰিছে সত্ৰ নগৰী বৰপেটা। আজি দৌলোৎসৱৰ প্ৰথমটো দিন।পুৱাই হোলী গীত গাই বৰপেটা চহৰ পৰিভ্ৰমণ কৰে বৰপেটাবাসীয়ে। এইবাৰ তিনি দিনীয়াকৈ বুঢ়া দেউল পালন কৰিছে বৰপেটা সত্ৰই।বৰপেটাৰ আকাশ-বতাহত এতিয়া কেৱল হোলী গীতৰ মূৰ্চ্ছনা ।
উৎসৱৰ আজিৰ প্ৰথম দিনটো অনুষ্ঠিত গোন্ধযাত্ৰাত বৰপেটাৰ ২২খন হাটীৰ উপৰি ইয়াৰ উপকণ্ঠ অঞ্চলৰ ভক্তসকলে পথাৰৰ পৰা নল, খাগৰি, ইকৰা আনি সত্ৰৰ টুপৰ চোতালত মেজি সাজে। আবেলি এক নিৰ্দিষ্ট ক্ষণত দৌলগোবিন্দ মহাপ্ৰভুক ভাজঘৰৰ পৰা গায়ন-বায়ন, ঢুলীয়া সমন্বিতে পূব দুৱাৰেদি উলিয়াই আনি গোসাঁইক ভক্তবৃন্দই টুপৰ চোতালত সজা মেজিৰ কাষলৈ নিয়ে।
ইয়াৰ পিছতে প্ৰজ্জ্বলিত মেজিৰ চাৰিওফালে গোসাঁইক ঘূৰোৱা হয়। চৌদিশ ঢোল, খোল, দবা, শংখ, ঘণ্টাৰ ধ্বনি, হোলীগীতৰ প্ৰতিধ্বনিয়ে মুখৰিত কৰি তোলে সত্ৰৰ চৌপাশ। মূল কীৰ্তন ঘৰৰ পৰা কলীয়া গোসাঁইক উলিয়াই আনি প্ৰতিষ্ঠা কৰা হয় যোগমোহন গৃহত। যোগমোহন গৃহৰ পৰাই ৰাতি কলীয়া গোসাঁইক দৌল গৃহত প্ৰতিষ্ঠা কৰা হ’ব।দৌল মহোৎসৱ উপলক্ষ্যে সত্ৰৰ চাৰিওফালে প্ৰজ্জ্বলন কৰা হ'ব স্থানীয় আতচবাজী।
বৰপেটা বৰধামত যুগ যুগ ধৰি পালন কৰি অহা হৈছে এই দৌল মহোৎসৱ। ৰাতি গুণমালা, লীলামালা,গুৰু ভটিমা,সেৱা কীৰ্ত্তন আদি নিবেদনৰ অন্তত অংকীয়া নাট উপস্থাপন কৰা হ’ব। ইপিনে স্থানীয় ৰাইজিং ক্লাবৰ উদ্যোগত আয়োজিত হৈছে ব্যতিক্ৰমী হোলীগীত প্ৰতিযোগিতাৰো।
Continue Reading
