ডিজিটেল ডেস্ক: বিসংগতিয়ে লগ নেৰা হৈছে দেশৰ প্ৰতিটো খণ্ডত। এইবাৰ ব্যক্তিগত খণ্ডত জনস্বাস্থ্য ৰহিত কাৰ্যত লিপ্ত থকাৰ তথ্য পোহৰলৈ আহিছে।তথ্য জনাৰ অধিকাৰ আইনৰ অধীনত মে’ৰ পৰা জুলাই মাহৰ ভিতৰত চলোৱা এক তদন্তৰ তথ্য পোহৰলৈ আহিছে। প্ৰাপ্ত তথ্য অনুসৰি দেশত বিক্ৰী হৈ থকা মছলাৰ ১২% মছলাৰ গুণগত মান আৰু সুৰক্ষাৰ মানদণ্ড পূৰণ নকৰা পৰিলক্ষিত হৈছে।
ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই ৪০৫৪ টা মছলাৰ নমুনা পৰীক্ষা কৰিছিল, ইয়াৰে ৪৭৪ টা নমুনা খোৱাৰ বাবে অযোগ্য বুলি পৰীক্ষাত ধৰা পৰিছে। ২০২৪ চনৰ এপ্ৰিল-মে’ মাহত ছিংগাপুৰ আৰু হংকঙত মছলাৰ মানদণ্ড ওপৰত প্ৰশ্ন উত্থাপিত হোৱাৰ পাছতে ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই এই পৰীক্ষা আৰম্ভ কৰিছিল।
পৰীক্ষা কৰা মছলাৰ ব্ৰেণ্ডৰ সবিশেষ তথ্য প্ৰকাশ কৰা নাই যদিও গুণগত মান আৰু সুৰক্ষাৰ মানদণ্ড পূৰণ নকৰা কোম্পানীসমূহৰ বিৰুদ্ধে বিহিত ব্যৱস্থা গ্ৰহণ কৰা হৈছে বুলি FSSAI য়ে সদৰি কৰিছে। একে সময়তে এম ডি এইচ আৰু এভাৰেষ্টৰ দৰে জনপ্ৰিয় মছলাৰ ব্ৰেণ্ডে, তেওঁলোকৰ সামগ্ৰী গ্ৰাহকৰ বাবে সুৰক্ষিত বুলি দাবী কৰা পৰিলক্ষিত হৈছে৷
সমগ্ৰ বিশ্বৰ লগতে ভাৰতীয় বজাৰটো এম ডি এইচ আৰু এভাৰেষ্টৰ মছলা বিক্ৰী হৈ আছে। জিয়ন মাৰ্কেট ৰিচাৰ্চৰ তথ্য অনুসৰি ২০২২ চনত ভাৰতৰ ঘৰুৱা মছলাৰ বজাৰৰ মূল্য আছিল ৮৭,৬০৮ কোটি টকাতকৈও অধিক।২০২৩-২৪ বিত্তীয় বৰ্ষত ভাৰতৰ পৰা মছলাৰ ৰপ্তানিৰ মূল্য ৩৭,৪২৫ কোটিতকৈ অধিক হ’ব বুলি অনুমান কৰা হৈছে।
Continue Reading
