গুৱাহাটীৰ নাৰেংগীত ভয়ংকৰ ঘটনা; ড্ৰাগছ আসক্ত ব্লেডমেনৰ আক্ৰমণত গুৰুতৰভাৱে আহত যুৱক

ডিজিটেল ডেস্ক: গুৱাহাটীৰ নাৰেংগীত ভয়ংকৰ ঘটনা। ব্লেডমেনৰ আতংকত অতিষ্ঠ নাৰেংগীবাসী। ব্লেডমেনৰ আক্ৰমণত ধৰাশায়ী হল এজন যুৱক।

ব্লেডমেনৰ আক্ৰমণত ১৫টা চিলাই পৰি গুৰুতৰভাৱে আহত হোৱা যুৱকজন হ'ল নাৰেংগীৰ কেন্দুগুৰিৰ ৰাকেশ ৰায়।

উল্লেখ্য যে, যোৱা নিশা ৯ বজাত নাৰেংগীৰ কেন্দুগুৰিত সংঘটিত হয় এই ভয়ংকৰ ঘটনা। কেন্দুগুৰিৰ নিবাসী বিকাশ দাস নামৰ এজন ড্ৰাগছ আসক্ত যুৱকে মহিলা এগৰাকীক ৰাজপথতে অপকৰ্ম কৰাৰ চেষ্টা কৰাত বাধা প্ৰদান কৰে ৰাকেশ ৰায় নামৰ যুৱক এজনে। ইয়াতে ক্ষুণ্ণ হৈ ড্ৰাগছ আসক্ত বিকাশ দাসে ৰাকেশক ব্লেডৰে ডিঙি ৰেপি হত্যাৰ চেষ্টা চলায়। 

গুৰুতৰভাৱে আঘাতপ্ৰাপ্ত বিকাশ দাস মাটিত ঢলি পৰাৰ লগে লগে ঘটনাস্থলীৰ পৰা পলায়ন কৰে আক্ৰমণকাৰী বিকাশ দাস। পিছমুহূৰ্তত স্থানীয় লোকে ৰাকেশ ৰায়ক উদ্ধাৰ কৰি চিকিৎসালয়লৈ প্ৰেৰণ কৰে। ইপিনে এই ঘটনা সন্দৰ্ভত ভুক্তভোগীয়ে নুনমাটি আৰক্ষী থানাত এজাহাৰ দাখিল কৰে। এজাহাৰৰ ভিত্তিত নুনমাটি আৰক্ষীয়ে ড্ৰাগছ আসক্ত বিকাশ দাসক গ্ৰেপ্তাৰ কৰে আৰু জব্দ কৰে ব্লেডখন। 

নুনমাটি আৰক্ষীয়ে বিকাশ দাসক জে’ললৈ প্ৰেৰণ কৰে।