ডিজিটেল ডেস্ক: গাজাৰ নেটজাৰিম কৰিডৰৰ পৰা ইজৰাইলী সেনা প্রত্যাহাৰ কৰা হৈছে। দেওবাৰে এই তথ্য প্রকাশ কৰিছে পেলেষ্টাইনী সন্ত্রাসবাদী সংগঠন হামাছে। ইজৰাইল আৰু হামাছৰ মাজত চলি থকা যুদ্ধ-বিৰতিৰ অংশ হিচাপে এই পদক্ষেপ ইজৰাইলে গ্ৰহণ কৰিছে বুলি ধাৰণা কৰা হৈছে।
ইজৰাইলৰ এই পদক্ষেপৰ পাছত দুয়ো দিশৰ পৰা দক্ষিণ আৰু উত্তৰ গাজাৰ মাজত লোকসকলে ভ্রমণ কৰিব পাৰিব। এই কৰিডৰটোৰ পৰা ইজৰাইলী সেনা প্ৰত্যাহাৰ কৰাৰ পাছত আমেৰিকা আৰু ইজিপ্তৰ নিৰাপত্তাৰ ঠিকা কর্মীয়ে এটা নিৰীক্ষণ চকী পৰিচালনা কৰিব। ইতিমধ্যে ৫গৰাকী পেলেষ্টাইনৰ নাগৰিকে সেই নিৰীক্ষণ চকীটোৰ মাজেৰে যাবলৈ অপেক্ষা কৰি থকা দেখা গৈছিল। আনহাতে, মধ্য গাজাৰ পৰা ইতিমধ্যে ইজৰাইলী সেনা প্রত্যাহাৰ কৰাৰ ব্যৱস্থা লৈছে ইজৰাইলে।
আনহাতে, ইজৰাইলে এই সেনা প্রত্যাহাৰ কৰাৰ বিষয়টোক হামাছে তেওঁলোকৰ জয় হৈছে বুলি বিজয়োল্লাস আৰম্ভকৰিছে। অৱশ্যে, ইজৰাইলী সেনাৰ ফালৰ পৰা কোনো তাৎক্ষণিক প্রতিক্রিয়া অহা নাই। ইফালে, হামাছে শনিবাৰে মুকলি কৰি দিয়া তিনি ইজৰাইলী পণবন্দীৰ ভিতৰৰ এজন, এলি শ্বাৰাবী ৪৯১ দিনৰ বন্দিত্বৰ পাছত তেওঁৰ পত্নী আৰু দুজনী জীয়ৰীক লগ পাবৰ বাবে ব্যাকুল হৈ আছে। কিন্তু দুর্ভাগ্যই তেওঁৰ বাবে অপেক্ষা কৰি আছে। ২০২৩ চনৰ ৭ অক্টোবৰত হামাছে ইজৰাইলক কৰা আক্ৰমণত এলিৰ পত্নী আৰু তেওঁৰ দুজনী জীয়ৰীৰ যে মৃত্যু হৈছে সেই বিষয়ে এলি এতিয়াও অৱগত নহয়।
(দৈনিক জনমভূমিৰ প্ৰতিবেদন)
Continue Reading
