মহিলা ৰোগীৰ মৃত্যুক কেন্দ্ৰ কৰি গৌৰীপুৰ হাস্পতালত উত্তপ্ত পৰিস্থিতি; বিভিন্ন সামগ্ৰী ভাঙি চূৰমাৰ

ডিজিটেল ডেস্ক: ধুবুৰীৰ গৌৰীপুৰৰ এখন ব্যক্তিগত খণ্ডৰ চিকিৎসালয়ত উত্তপ্ত পৰিস্থিতি। গৌৰীপুৰ হাস্পতাল নামৰ ব্যক্তিগত খণ্ডৰ চিকিৎসালয়ত এগৰাকী মহিলাৰ মৃত্যুক কেন্দ্ৰ কৰি আজি সৃষ্টি হ’ল লংকাকাণ্ড।

চিকিৎসকৰ ভুলৰ বাবে মহিলাগৰাকীৰ মৃত্যুৰ অভিযোগত গৌৰীপুৰ নাৰ্ছিং হোমত বিস্তৰ ক্ষতিসাধন মৃতকৰ পৰিয়ালৰ।

বিভিন্ন সামগ্ৰী ভাঙি চূৰমাৰ কৰি চিকিৎসালয়খন বন্ধ কৰাৰ দাবী পৰিয়ালৰ লোকৰ।

অতি সংকটজনক অৱস্থাত ২৪ টা দিনৰ ভিতৰত তিনিটাকৈ অস্ত্ৰোপচাৰ কৰা হৈছিল মহিলাগৰাকীৰ। মহিলাগৰাকী মধুশৌলমাৰী ২য় খণ্ড গাঁৱৰ মঞ্জিলা বিবি বুলি জানিব পৰা গৈছে। 

প্ৰায়ে নাৰ্ছিং হোমখনত চিকিৎসকৰ ভুল অস্ত্ৰোপচাৰৰ বাবে বহু ৰোগী চিৰদিনৰ বাবে ঘুণীয়া হোৱাৰ অভিযোগ উত্থাপন হৈছে৷

অকল ধনৰ বাবেই ৰোগীৰ জীৱনক লৈ হেতালি খেলাৰ দীৰ্ঘদিনীয়া অভিযোগ গৌৰীপুৰ নাৰ্ছিং হোমৰ বিৰুদ্ধে।

এইবেলিও ভুক্তভোগী পৰিয়ালে উন্নত চিকিৎসাৰ বাবে বাৰে বাৰে ৰোগীৰ ৰিলিজ বিচাৰিছিল যদিও চিকিৎসক আৰু নাৰ্ছিং হোম কৰ্তৃপক্ষই ৰিলিছ দিয়া নাছিল মহিলা ৰোগীক। কিন্তু ৰহস্যজনকভাৱে মহিলাগৰাকীৰ মৃত্যুৰ এক ঘণ্টা পূৰ্বে দিয়া হৈছিল ৰিলিজ।

 পিছত মহিলাগৰাকীক উন্নত চিকিৎসাৰ বাবে বঙাইগাঁও লৈ যাওঁতে আধা বাটতেই মৃত্যু হয় মহিলাগৰাকীৰ।