২১০ কোটি টকা ব্যয়ৰে নিৰ্মাণ ডিব্ৰুগড়ৰ খনিকৰ বহুমুখী ক্ৰীড়া প্ৰকল্প; ৩০ জানুৱাৰীত মুকলি কৰিব গৃহমন্ত্ৰী অমিত শ্বাহে

ডিজিটেল ডেস্ক: ৰাজ্যৰ ক্ৰীড়াপ্ৰেমীৰ বাবে এটি সুখবৰ। অহা ৩০ জানুৱাৰীত দেশৰ গৃহমন্ত্ৰী অমিত শ্বাহে মুকলি কৰিব ডিব্ৰুগড়ৰ লগতে ৰাজ্যবাসীৰ বহু প্ৰত্যাশিত খনিকৰ বহুমুখী ক্ৰীড়া প্ৰকল্প। 

২০১৮ চনৰ ৫ জুলাইত আধাৰশিলা স্থাপন কৰি ৰাজ্যৰ ক্ৰীড়া ক্ষেত্ৰখনৰ সোণালী ভৱিষ্যতৰ সপোন দেখা ৰাজ্যৰ তদানীন্তন মুখ্যমন্ত্ৰী সৰ্বানন্দ সোণোৱালৰ এই প্ৰকল্পই পূৰ্ণতা লাভ কৰিব।

প্ৰাৰম্ভিক পৰ্যায়ত প্ৰায় ২১০ কোটি টকা ব্যয় সাপেক্ষে নিৰ্মাণ কৰা এই বহুমুখী ক্ৰীড়া প্ৰকল্পটোত প্ৰথম পৰ্যায়ত ৫ হাজাৰ আৰু পৰৱৰ্তী পৰ্যায়ত ৩৫ হাজাৰ দৰ্শকৰ আসনৰ সু ব্যৱস্থা থাকিব বুলি মুখ্যমন্ত্ৰী ড° হিমন্ত বিশ্ব শৰ্মাই সদৰী কৰে। 

এই ক্ৰীড়া প্ৰকল্পটোত সাঁতোৰ, দৌৰ, ফুটবলকে ধৰি বিভিন্ন বহিঃ আৰু আন্তঃক্ৰীড়াৰ বাবে আন্তঃৰাষ্ট্ৰীয় পৰ্যায়ৰ আন্তঃগাঁথনিৰ লগতে খেলুৱৈসকলৰ থকাৰ বাবে হোষ্টেল, অভিজ্ঞ প্ৰশিক্ষক, ফিজিঅ'ৰ লগতে প্ৰতি গৰাকী খেলুৱৈৰ পৰিপুষ্টিৰ বাবে অভিজ্ঞ নিউট্ৰিছনিষ্টৰ ব্যৱস্থা থাকিব। 

শিক্ষা আৰু স্বাস্থ্যৰ পাছতেই ডিব্ৰুগড়ৰ ক্ৰীড়া ক্ষেত্ৰখনক চহকী কৰাৰ ক্ষেত্ৰত এই বহুমুখী ক্ৰীড়া প্ৰকল্পই উল্লেখযোগ্য ভূমিকা পালন কৰিব। বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাৰ তৎপৰতাত অতি কম সময়ৰ ভিতৰতে সাজু হৈ উঠা খনিকৰ ষ্টেডিয়ামৰ বাবে ধন্যবাদ জনায় ডিব্ৰুগড়বাসীয়ে। এই ক্ৰীড়া প্ৰকল্পই অসমৰ লগতে চুবুৰীয়া ৰাজ্য অৰুণাচল, নাগালেণ্ডৰ প্ৰতিভাৱান খেলুৱৈসকলকো উপকৃত কৰিব।