ডিজিটেল ডেস্ক : বিশ্ববিদ্যালয়সমূহৰ মান, দক্ষতা, গুৰুত্ব, গৱেষণা-উদ্ভাবন, শিক্ষণ আদি বিভিন্ন মূল্যায়নেৰে কৰা শ্ৰেণীকৰণ বা ৰেংকিঙৰ তালিকা 'কিউ এছ ৱ'ৰ্ল্ড ইউনিভাৰ্ছিটি ৰেংকিং ২০২৭' বৃহস্পতিবাৰে প্ৰকাশ পায়। এই তালিকা মতে, একেৰাহে দ্বিতীয় বছৰৰ বাবে আই আই টি, দিল্লীয়ে ভাৰতৰ শিক্ষা প্রতিষ্ঠানসমূহৰ ভিতৰত শীর্ষ স্থান লাভ কৰে। আই আই টি দিল্লীয়ে পাঁচটা স্থান উন্নীত হৈ বিশ্বৰ ভিতৰত ১১৮ সংখ্যক স্থান লাভ কৰে।
উল্লেখযোগ্য যে ভাৰতৰ শীর্ষ ১০খন শিক্ষা প্রতিষ্ঠানৰ ভিতৰত আই আই টি গুৱাহাটীও আছে। দেশৰ ১০খন শীর্ষ শিক্ষা প্রতিষ্ঠানৰ ভিতৰত আধিপত্য বিস্তাৰ কৰিছে আই আই টিবোৰে। আই আই টি, দিল্লীৰ পাছত দ্বিতীয় আৰু তৃতীয় স্থানত আছে আই আই টি, বোম্বে (বিশ্বজুৰি স্থান ১৩৪) আৰু আই আই টি, মাদ্রাজ (বিশ্বজুৰি স্থান ১৭০)। উল্লেখযোগ্য যে বিশ্বৰ শীৰ্ষ ২০০খন শিক্ষা প্রতিষ্ঠানৰ মাজত ভাৰতৰ উক্ত তিনিখন প্রতিষ্ঠানহে আছে। দেশৰ শীৰ্ষ ১০ত থকা আন শিক্ষা প্রতিষ্ঠানসমূহ হৈছে আই আই টি, খড়গপুৰ (২০৫), আই আই টি, কানপুৰ (২২১), ইণ্ডিয়া ইনষ্টিটিউট অব্ ছায়েন্স, বাংগালোৰ (২২১), দিল্লী বিশ্ববিদ্যালয় (৩২২), আই আই টি, ৰুৰকী (৩৩৫) আৰু আই আই টি, গুৱাহাটী (৩৪৯)। ইফালে, পঞ্চদশ বছৰৰ বাবে বিশ্বৰ ভিতৰত শীর্ষ স্থান লাভ কৰিছে আমেৰিকাৰ মাছাচুছেছ ইন্ষ্টিটিউট অব্ টেকনল'জি (এম আই টি)-এ।
উল্লেখযোগ্য যে বিশ্বৰ ভিতৰত শীর্ষ ১০খন শিক্ষা প্ৰতিষ্ঠানৰ তালিকাত আধিপত্য দেখা গৈছে আমেৰিকা আৰু ব্রিটেইনৰ (ইউকে)। দ্বিতীয় স্থানত আছে ব্রিটেইনৰ ইম্পেৰিয়েল কলেজ লণ্ডন আৰু আমেৰিকাৰ ষ্টেন্ফ'ৰ্ড বিশ্ববিদ্যালয়। চতুর্থ স্থানত আছে ব্রিটেইনৰ অক্সফ'র্ড বিশ্ববিদ্যালয়, পঞ্চম স্থানত আমেৰিকাৰ হার্ভার্ড বিশ্ববিদ্যালয় আৰু সপ্তম স্থানত আমেৰিকাৰ কেলিফর্নিয়া ইষ্টিটিউট অব টেকনলজি (কেকে)। অষ্টম স্থানত আছে দুখন বিশ্ববিদ্যালয়-ছুইজাৰলেণ্ডৰ ই টি এইচ জুৰিখ আৰু ব্রিটেইনৰ ইউনিভাৰ্ছিটি কলেজ লণ্ডন (ইউ চি এল)। দশম স্থানত আছে নেশ্যনেল ইউনিভাৰ্ছিটি অব্ ছিংগাপুৰ (এন ইউ এছ)।
উৎস: দৈনিক জনমভূমি
Continue Reading
