ইংলেণ্ডকো চেৰ পেলালে দেশৰ বিশেষ অভিযানে, প্ৰধানমন্ত্ৰীৰ অভিনন্দন

নতুন দিল্লী : দেশত প্ৰতিষেধকৰ নাটনি, প্ৰতিষেধক প্ৰদানৰ নামত হোৱা কেলেংকাৰি, ভুৱা প্ৰতিষেধক কাণ্ড আদিক লৈ বিতৰ্ক চলিছে যদিও টিকাকৰণ অভিযানক তীব্ৰতা দিয়াৰো চেষ্টা চলিছে। টিকাকৰণ অভিযান সম্পৰ্কত ভাৰতে এক নতুন অভিলেখ গঢ়িবলৈ সক্ষম হৈছে। মুঠ ভেকচিন প্ৰদানৰ সংখ্যাৰ ফালৰপৰা ভাৰতে ইংলেণ্ডক চেৰ পেলাবলৈ সক্ষম হৈছে। ভাৰতত এতিয়ালৈ মুঠ ৩২.৩৬ কোটি পালি প্ৰতিষেধক প্ৰদান কৰা হৈছে।

আৰু পঢ়িব পাৰিব : কূটাঘাতৰ ষড়যন্ত্ৰ! পাকিস্তানৰ গতি-বিধিয়ে উদ্বেগ বঢ়াইছে ভাৰতীয় সেনাৰ

ইয়াৰ বিপৰীতে ইংলেণ্ডে এতিয়ালৈ দিছে ৩২.৩৩কোটি পালি প্ৰতিষেধক। এনে কৃতিত্বৰ মাজতে অহা আন এক সুখবৰ হৈছে যে, দেশত দৈনিক সংক্ৰমণৰ সংখ্যাও হ্ৰাস পাই আহিছে। বিগত ২৪ঘণ্টত দেশত মুঠ সংক্ৰমিতৰ সংখ্যা হৈছে ৪৬,১৪৮। বিগত ২৪ঘণ্টাত মৃত্যু হোৱা লোকৰ সংখ্যাও সহস্ৰৰ তলতে আছে। বিগত ২৪ ঘণ্টাত মৃত্যু হৈছে ৯৭৯জন আক্ৰান্তৰ।

আৰু পঢ়িব পাৰিব : অসম আৰক্ষীত নতুন সংযোজন, সাৰি নাযায় অপৰাধী!

ইফালে, আজি পুৱাই প্ৰধানমন্ত্ৰী নৰেন্দ্ৰ মোদীয়ে টুইটযোগে দেশৰ টিকাকৰণ অভিযানে তীব্ৰতা লাভ কৰাৰ প্ৰসংগ উত্থাপন কৰে। তেওঁ এই অভিযানৰ সৈতে জড়িত সকলোকে অভিনন্দনো জ্ঞাপন কৰে। সকলোকে বিনামূলীয়াকৈ প্ৰতিষেধক প্ৰদান কৰাৰ বাবে কেন্দ্ৰ দায়বদ্ধ বুলিও তেওঁ দোহাৰে। উল্লেখ্য যে, বিগত এসপ্তাহতে দেশত ৩ কোটি, ৯১লাখৰো অধিক প্ৰতিষেধক প্ৰদান কৰা হৈছে।