ডিজিটেল ডেস্কঃ প্ৰলোভনত পৰি পাকিস্তানৰ চোৰাংচোৱা সংস্থা ISIৰ বাবে চোৰাংচোৱাগিৰি কৰাৰ অভিযোগত গ্ৰেপ্তাৰ হৈছে ফিৰোজাবাদৰ অস্ত্ৰ-শস্ত্ৰ কাৰখানাৰ এজন চাৰ্জ মেন। পাকিস্তানস্থিত হেণ্ডলাৰৰ সৈতে গোপনীয় সামৰিক তথ্য ভাগ-বতৰা কৰাৰ অভিযোগ উত্থাপন কৰি উত্তৰ প্ৰদেশৰ সন্ত্ৰাসবাদ বিৰোধী দলে ৰবীন্দ্ৰ কুমাৰ নামৰ এজন লোকক আৰু তেওঁৰ সহযোগীক আগ্ৰাৰ পৰা আটক কৰে।
বিষয়াসকলৰ মতে, ৰবীন্দ্ৰ কুমাৰে ফিৰোজাবাদৰ হজৰতপুৰস্থিত অস্ত্ৰ-শস্ত্ৰ নিৰ্মাণ ফেক্টৰীত কাম কৰিছিল আৰু স্পৰ্শকাতৰ নথি-পত্ৰৰ সুবিধা লাভ কৰিছিল। তদন্তত দেখা গৈছে যে তেওঁ ISIৰ সৈতে জড়িত এগৰাকী মহিলাৰ সৈতে দৈনিক উৎপাদন প্ৰতিবেদন, স্ক্ৰীনিং কমিটীৰ গোপনীয় চিঠি, বাকী থকা ৰিকুইজিচন তালিকা, আৰু ড্ৰ’ন আৰু গগনিয়ান প্ৰকল্পৰ সবিশেষকে ধৰি অতি গোপনীয় তথ্য ভাগ-বতৰা কৰিছিল।
নেহা শৰ্মা বুলি ভুৱা নাম লৈ মহিলাগৰাকীয়ে যোৱা বছৰ ফেচবুকত ৰবীন্দ্ৰক ফ্ৰেণ্ড ৰিকুৱেষ্ট পঠাইছিল। তেওঁলোকৰ মাজত সোনকালেই বন্ধুত্ব গঢ় লৈ উঠে। বন্ধুত্বৰ সময়ত আৰম্ভ হৈছিল প্ৰেমৰ কথাও। ফেচবুক মেচেঞ্জাৰত কথা পতাৰ পাছত হোৱাটছএপ নম্বৰৰ পৰা আৰম্ভ হ’ল ফোন কথোপকথন।
তদন্তকাৰীয়ে জানিব পাৰিছে পত্নী আৰু পৰিয়ালৰ আন যিকোনো সদস্যৰ কোনো সন্দেহ নহ’বলৈ আৰু তেওঁলোকৰ আদান-প্ৰদান লুকুৱাবলৈ ৰবীন্দ্ৰই নেহা শৰ্মাৰ নম্বৰটো সহকৰ্মী চন্দন ষ্ট’ৰ কীপাৰ ২ নামেৰে নিজৰ মোবাইলত চেভ কৰিছিল। অভিযোগ অনুসৰি আৰ্থিক সমস্যাত পৰিও হোৱাটছএপৰ জৰিয়তে তেওঁলৈ গোপনীয় নথি-পত্ৰ প্ৰেৰণ কৰিছিল ৰবীন্দ্ৰই।
অনুসন্ধানৰ সময়ত ইউ পি এ টি এছে ৰবীন্দ্ৰৰ মোবাইল ফোনত স্পৰ্শকাতৰ তথ্য আৱিষ্কাৰ কৰে, য’ত অৰ্ডানেন্স ফেক্টৰী আৰু ৫১ গোৰ্খা ৰাইফলছ ৰেজিমেণ্টৰ জ্যেষ্ঠ বিষয়াসকলে চলোৱা লজিষ্টিক ড্ৰ’ন পৰীক্ষাৰ গোপনীয় তথ্যও আৱিষ্কাৰ কৰে। বিষয়াসকলে কয় যে তেওঁ পাকিস্তানস্থিত আই এছ আই হেণ্ডলাৰৰ সৈতে প্ৰত্যক্ষ যোগাযোগ বজাই ৰাখিছিল, ভাৰতৰ প্ৰতিৰক্ষা প্ৰকল্প সম্পৰ্কীয় চোৰাংচোৱা তথ্য প্ৰেৰণ কৰিছিল।
গ্ৰেপ্তাৰৰ পিছতে এ টি এছৰ বিষয়াসকলে ৰবীন্দ্ৰৰ এজন সহযোগীকো আগ্ৰাৰ পৰা আটক কৰে। সংস্থাটোৱে হোৱাটছএপ চেট আৰু গোপনীয় নথিকে ধৰি ডিজিটেল প্ৰমাণ উদ্ধাৰ কৰিছে, যিবোৰ এতিয়া তদন্তৰ অংশ হিচাপে বিশ্লেষণ কৰা হৈছে।
