ইতিহাস ৰচাৰ দিশে দেশৰ এগৰাকী মহিলা ন্যায়াধীশ, জানক সবিশেষ

নতুন দিল্লী : দেশে প্ৰথমগৰাকী মহিলা মুখ্য ন্যায়াধীশ লাভ কৰাৰ দিশে অগ্ৰসৰ হৈছে। বি ভি নাগৰত্না দেশৰ প্ৰথমগৰাকী মহিলা মুখ্য ন্যায়াধীশ হ’ব। ২০২৭ চনত তেওঁ এই দায়িত্বত ন্যস্ত হ’ব। উচ্চতম ন্যায়ালয় ক’লাজিয়ামে দেশৰ শীৰ্ষ ন্যায়িক পদবীৰ বাবে ৯গৰাকী ন্যায়াধীশৰ নাম প্ৰস্তাৱ কৰিছে। এই ক’লাজিয়ামে সম্প্ৰতি কৰ্ণাটক উচ্চ ন্যায়ালয়ত কৰ্মৰত ন্যায়াধীশ বি ভি নাগৰত্নাৰ নামো অনুমোদন কৰিছে সৰ্বোচ্চ ন্যায়ালয়ৰ শীৰ্ষ পদবীলৈ।

তেওঁ ২০০৮চনত কৰ্ণাটক উচ্চ ন্যায়ালয়ত অতিৰিক্ত ন্যায়াধীশ হিচাপে নিযুক্ত হৈছিল আৰু তাৰ দুবছৰ পাছত তেওঁ স্থায়ী ন্যায়াধীশ হিচাপে নিযুক্ত হয়। তেওঁ অৱশ্যে মাহজোৰা কাৰ্যকালৰ বাবেহে নিযুক্ত হোৱাৰ সম্ভাৱনা আছে। দেশৰ ন্যায়িক ব্যৱস্থাত তেওঁৰ নিযুক্তি এক ঐতিহাসিক ঘটনা হিচাপে বিবেচিত হ’ব।

উল্লেখ্য যে, তেওঁৰ পিতৃ ই এছ ভেংকটাৰামাইয়াও দেশৰ মুখ্য ন্যায়াধীশৰ পদবীত অধিষ্ঠিত হৈছিল। ১৯৮৯ চনৰ জুন মাহৰ পৰা সেই বছৰৰ ডিচেম্বৰ মাহলৈ তেওঁ এই পদত নিযুক্ত হৈ আছিল। ন্যায়াধীশ হিমা কোহী আৰু ন্যায়াধীশ বেলা ত্ৰিবেদী এই অনুমোদিত তালিকাত থকা আন দুগৰাকী মহিলা ন্যায়াধীশ।