জিকা ভাইৰাছৰ দ্ৰুত সংক্ৰমণ কেৰালাত! আক্ৰান্ত ২২মহীয়া শিশু

কেৰালাঃ দেওবাৰে কেৰালাত ২২মহীয়া শিশুসহ জিকা ভাইৰাছত আক্ৰান্ত হৈছে ৩জন। ইয়াৰ লগে লগে এই ভাইৰাছত আক্ৰান্তৰ সংখ্যা ১৮জনলৈ বৃদ্ধি পাইছে কেৰালাত। বৰ্তমান ক’জিকোড়ে মেজিকেল কলেজ আৰু আলাৰপপুজাই ইমষ্টিটিউট অব্ ভাইৰ’ল’জী ইউনিটে পৰীক্ষাৰ ব্যৱস্থা কৰা বুলি কেৰালাৰ স্বাস্থমন্ত্ৰী ভীনা জৰ্জে সদৰী কৰিছে। শেহতীয়াকৈ এক বিবৃতিত প্ৰকাশ পোৱা মতে, ২২ মহীয়া এজন শিশুৰ দেহত ধৰা পৰিছে জিকা ভাইৰাছৰ অৱস্থিতি।

ইয়াৰোপৰি ৪৬ আৰু ২৯বছৰীয়া স্বাস্থ্যকৰ্মীও আক্ৰান্ত হৈছে।’ চলিত সপ্তাহত ২৪বছৰীয়া এগৰাকী মহিলা কেৰালাত সৰ্বপ্ৰথম জিকা ভাইৰাছত আক্ৰান্ত হৈছিল। এইবাৰ শিশুৰ দেহতো এই ভাইৰাছৰ অৱস্থিতি লাভ কৰা ঘটনাই উদ্বিগ্ন কৰি তুলিছে সকলোকে। কেৰালাৰ স্বাস্থ্যমন্ত্ৰীয়ে জানিবলৈ দিয়া মতে, জিকা ভাইৰাছক ৰুধিবলৈ ইতিমধ্যে বিহিত কাৰ্যপন্থা হাতত লৈছে স্বাস্থ্য বিভাগে। জ্বৰ অনুভৱ কৰিলেই গৰ্ভৱতী মহিলাই শীঘ্ৰে পৰীক্ষা কৰাটো উচিত বুলিও সদৰী কৰে স্বাস্থ্যমন্ত্ৰীগৰাকীয়ে।

বিশেষজ্ঞৰ মতে, ‘এডিছ মহৰ জৰিয়তে জিকা ভাইৰাছ বিয়পি পৰে। অতি ক্ষিপ্ৰতাৰে এই ভাইৰাছ সংক্ৰমিত হয়। কোনো ব্যক্তিক যদি এডিছ মহে কামোৰে, তেতিয়া তেওঁ এই ভাইৰাছত আক্ৰান্ত হয়। পাছত এই মহে সুস্থ মানুহক স্পৰ্শ কৰিলে সেই ব্যক্তিজনো জিকা ভাইৰাছত আক্ৰান্ত হ’ব পাৰে।’ গৰ্ভস্থ সন্তানৰ বাবে মাৰাত্মক ৰূপ ধাৰণ কৰিব পাৰে এই ভাইৰাছে। আনকি এই ভাইৰাছৰ সংক্ৰমণৰ ফলত আক্ৰান্ত শিশু দিব্যাংগ হোৱা, মগজুৰ স্বাভাৱিক আকাৰৰ পৰিৱৰ্তন, বিকাশজনিত সমস্যা আৰু শিশুৰ মৃত্যুৰো আশংকা কৰিছে বিশেষজ্ঞমহলে।