ডিজিটেল ডেস্কঃ বাৰাণসীৰ জ্ঞানৱাপী মছজিদ পূৰ্বে এটা হিন্দু মন্দিৰ আছিল। মছজিদ চৌহদত জৰীপ চলাই থকা ভাৰতীয় পুৰাতাত্ত্বিক জৰীপ (এএছআই)য়ে কৈছে যে বৰ্তমানে থকা মছজিদটোৰ পূৰ্বে তাত এটা হিন্দু মন্দিৰ আছিল।যোৱা বছৰৰ জুলাই মাহত বাৰাণসী জিলা আদালতে ভাৰতীয় পুৰাতাত্ত্বিক জৰীপ বিভাগক মছজিদ চৌহদৰ জৰীপ কৰিবলৈ নিৰ্দেশ দিছিল।
শেহতীয়াকৈ ৰাজহুৱা কৰা এএছআইৰ প্ৰতিবেদনত কোৱা হৈছে যে বিগত চাৰি মাহৰ জৰীপত বৈজ্ঞানিক অধ্যয়ন/জৰীপৰ আধাৰত স্থাপত্যৰ অৱশিষ্ট, বৈশিষ্ট্য, শিল্পকলা, শিলালিপি, কলা আৰু ভাস্কৰ্যৰ অধ্যয়ন আদিৰ ওপৰত ভিত্তি কৰি সেই স্থানত পূৰ্বে এটা হিন্দু মন্দিৰ আছিল বুলি সহজে ক'ব পাৰি।
জ্ঞানৱাপী মছজিদ পৰিচালনা কৰা অঞ্জুমান ইন্তেজামিয়া মছজিদৰ যুটীয়া সম্পাদক এছ এম য়াছিনে কয়, "এয়া এখন প্ৰতিবেদনহে, সিদ্ধান্ত নহয়। প্ৰতিবেদনখন ৮৩৯ পৃষ্ঠাৰ । সেয়ে সমগ্ৰ প্ৰতিবেদন খন অধ্যয়ন কৰি বিশ্লেষণত কৰাত সময় লাগিব। এই বিষয়ত বিশেষজ্ঞসকলৰ পৰামৰ্শ লোৱা হ'ব। সকলো কথা বিবেচনাৰ বাবে আদালতলৈ নিয়া হ'ব।"
মছজিদ পৰিচালনা পক্ষই বিশ্বাস কৰে যে সম্ৰাট আকবৰৰ প্ৰায় ১৫০ বছৰ আগৰে পৰা মুছলমানসকলে জ্ঞানৱাপী মছজিদত নামাজ পঢ়ি আহিছে।
এএছআইৰ প্ৰতিবেদন অনুসৰি, "এটা কোঠাৰ ভিতৰত পোৱা আৰবী-পাৰ্চী ভাষাত লিখা এখন শিলালিপিত উল্লেখ কৰা হৈছে যে মছজিদটো ঔৰঙ্গজেবৰ শাসনকালৰ ২০ সংখ্যক বছৰত (১৬৭৬-৭৭) নিৰ্মাণ কৰা হৈছিল। সেয়েহে, দেখা গৈছে যে সপ্তদশ শতিকাত ঔৰঙ্গজেৱৰ শাসনকালত পূৰ্ব-বিদ্যমান গাঁথনিটো ধ্বংস কৰা হৈছিল আৰু ইয়াৰ কিছু অংশ বৰ্তমানৰ গাঁথনিৰ সৈতে সলনি কৰা হৈছিল।"
এএছআইৰ এই জৰীপত জ্ঞানৱাপী মছজিদত বন্ধ হৈ থকা ৱাজুখানাৰ বৈজ্ঞানিক জৰীপ কৰা হোৱা নাই। হিন্দু পক্ষই দাবী কৰে যে ৱাজুখানাত এটা শিৱলিংগ আছে।
গোচৰটোৰ বাদী ৰাখী সিঙক প্ৰতিনিধিত্ব কৰা অধিবক্তা অনুপম দ্বিবেদীয়ে প্ৰতিবেদনখন গুৰুত্বপূৰ্ণ বুলি অভিহিত কৰি কয়, "ঔৰঙ্গজেৱে মছজিদ নিৰ্মাণ কৰাৰ আগতে চৌহদত এটা হিন্দু মন্দিৰ আছিল বুলি এএছআইয়ে কৰা মন্তব্যই আমাৰ গোচৰটো শক্তিশালী কৰিব। প্ৰমাণৰ দৃষ্টিকোণৰ পৰা ই এক অতি গুৰুত্বপূৰ্ণ ভূমিকা পালন কৰিব।"
Continue Reading
