যোৰহাটৰ ফ্লেটত চুৰি ঘটনা; ৫জনক গ্ৰেপ্তাৰ

ডিজিটেল ডেস্ক: চলিত মাহত যোৰহাটৰ দুটা ফ্লেটত সংঘটিত হোৱা চুৰিকাণ্ডৰ লগত জড়িত চোৰৰ গেংটোক গ্ৰেপ্তাৰ কৰিবলৈ সক্ষম হৈছে যোৰহাট আৰক্ষী। যোৰহাট আৰক্ষীয়ে অনুসন্ধান চলাই দৰং জিলাৰ দলগাঁৱৰ পৰা এই চোৰৰ দলটোক গ্ৰেপ্তাৰ কৰে। লগতে এই চোৰৰ দলটোৱে চুৰি কৰা অলংকাৰ সমূহ বিক্ৰী কৰা প্ৰতিষ্ঠান দুটাৰ দুগৰাকীক আৰক্ষীয়ে গ্ৰেপ্তাৰ কৰিছে। 

আৰক্ষীয়ে গ্ৰেপ্তাৰ কৰা চোৰ কেইটা হৈছে লুকমন আলী, চাইদুৰ ৰহমান, নুৰ মহমদ আলী। এই চোৰ তিনিটাই যোৰহাটৰ দুটা ফ্লেটত চুৰি কৰা সোণৰ অলংকাৰ বিক্ৰী কৰা দুখন প্ৰতিষ্ঠান দুগৰাকী হৈছে দৰং জিলাৰ দলগাঁৱৰ আবু বকৰ চিদ্দিক আৰু বৰপেটা জিলাৰ চাপ্ৰাৰ ইমৰান আহমেদ। 

গ্ৰেপ্তাৰ কৰা চোৰকেইটাৰ পৰা আৰক্ষীয়ে কেইবাটাও মোবাইল ফোন জব্দ কৰিছে। উল্লেখ্য যে, চলিত মাহৰ ৫ আৰু ৭ ফেব্ৰুৱাৰীত মধুকুঞ্জ এপাৰ্টমেণ্ট আৰু এ বি জি হাইটত এই চোৰৰ দলটোৱে চুৰি কাৰ্য সংঘটিত কৰিছিল। আৰক্ষীয়ে চি চি টি ভি ফুটজ সংগ্ৰহ কৰি অনুসন্ধান চলাই এই চোৰৰ দল টোক গ্ৰেপ্তাৰ কৰিবলৈ সক্ষম হয়। সম্প্ৰতি এই চোৰ চক্ৰটোক আৰক্ষীয়ে জেৰা অব্যাহত ৰাখিছে।