ফিফা বিশ্বকাপ-২০২৬: মেক্সিকোক পৰাজিত কৰা ইংলেণ্ডৰ জুড বেলিংহামৰ অভিলেখ

ডিজিটেল ডেস্ক : ফিফা বিশ্বকাপৰ পৰা কানাডাৰ পাছত আন এখন সহযোগী আয়োজক দেশ মেক্সিকোৱেও বিদায় লয়। দেওবাৰে ইয়াৰ এষ্টাডিয়' এজটেকা ষ্টেডিয়ামত অনুষ্ঠিত বিশ্বকাপৰ এখন প্রি-কোৱাৰ্টৰ ফাইনেল মেচত মেক্সিকোক ইংলেণ্ডে ৩-২ গ'লত পৰাজিত কৰে। এই মেচখনত ইংলেণ্ডৰ লগতে দলটোৰ জুড বেলিংহামেও অভিলেখৰ সৃষ্টি কৰে। খেলৰ ৩৬ মিনিটত বেলিংহামে এটা দর্শনীয় হেডেৰে দলৰ হৈ প্ৰথমটো গ'ল দিয়ে। ইয়াৰ মাত্র ৯৮ ছেকেণ্ডৰ পাছতে তেওঁ আন এটা গ'ল দি ইংলেণ্ডৰ জয় প্রায় নিশ্চিত কৰে। 

বেলিংহামৰ এই গ'ল দুটা বিশ্বকাপৰ ইতিহাসত আটাইতকৈ কম সময়ৰ ব্যৱধানত দিয়া গ'ল ৰূপে পৰিগণিত হয়। ইফালে এষ্টাডিয়' এজটেকা ষ্টেডিয়ামত বিশ্বকাপৰ মেচত মেক্সিকোক পৰাজিত কৰা ইংলেণ্ড প্রথমটো দল ৰূপে পৰিগণিত হয়। বেলিংহামে এই ষ্টেডিয়ামখনত ৪০ বছৰৰ পাছত এনেধৰণৰ খেল প্ৰদৰ্শন কৰে, যাৰ তুলনা ১৯৮৬ চনৰ বিশ্বকাপত ডিয়েগো মাৰাডোনাৰ প্ৰদৰ্শনৰ সৈতে কৰা হৈছে। 

মন কৰিবলগীয়া যে ইংলেণ্ডৰ দলটো মেক্সিকোত উপস্থিত হোৱাৰ পাছতে মেক্সিকোৰ একাংশ উদণ্ড ফুটবলপ্রেমীৰ আতিশয্যৰ সন্মুখীন হয়। দলটো থকা হোটেলৰ কাষত মেক্সিকোৰ ফুটবলপ্রেমীয়ে হুলস্থুলীয়া পৰিৱেশৰ সৃষ্টি কৰি খেলুৱৈসকলক মানসিক আৰু শাৰীৰিকভাৱে চাপৰ সৃষ্টি কৰাৰ প্ৰচেষ্টা চলায়। অৱশ্যে ইংলেণ্ড দলে গ্ৰহণ কৰা কৌশলে মেক্সিকোৰ উদণ্ড ফুটবলপ্রেমীয়ে দিয়া চাপে কাম নিদিলে।

উৎস: দৈনিক জনমভূমি