কেন্দ্ৰীয় সংস্থাসমূহক নিজৰ মতে ব্যৱহাৰ কৰি গৈছে বিজেপিয়ে, ৰাষ্ট্ৰপতি মুৰ্মুলৈ বিৰোধীৰ পত্ৰ

পত্ৰখনত তেওঁলোকে মূল্যবৃদ্ধি আৰু অত্যাৱশ্যকীয় খাদ্য সামগ্ৰীৰ ওপৰত জিএছটি বৃদ্ধিৰ প্ৰসংগতো  চৰকাৰৰ কঠোৰ সমালোচনা কৰে। পত্ৰ খনত কোৱা হৈছে যে  মোডী চৰকাৰে বিৰোধীৰ প্ৰতি প্ৰতিশোধ লোৱাৰ বাবে কেন্দ্ৰীয় সংস্থাসমূহৰ ক্ষমতাৰ অপব্যৱহাৰ কৰি আছে।সেয়ে বিষয়টো গভীৰ ভাবে গ্ৰহণ কৰিবলৈ ৰাষ্ট্ৰপতিক বিৰোধী দলৰ সাংসদসকলে আহ্বান জনায়। 

উল্লেখ্য দ্ৰৌপদী মুৰ্মুয়ে সোমবাৰে পুৱা দেশৰ ১৫ তম ৰাষ্ট্ৰপতি হিচাপে শপত গ্ৰহণ কৰিছিল। তেওঁ দেশৰ প্ৰথম জনজাতীয় সম্প্ৰদায়ৰ ৰাষ্ট্ৰপতি । মঙলবাৰে বিৰোধীয়ে তেওঁলৈ লিখা  পত্ৰখনৰ আৰম্ভণিতে তেওঁলোকে ৰাষ্ট্ৰপতিলৈ  উষ্ম শুভেচ্ছা  জ্ঞাপন কৰে। পত্ৰ খনত লিখা হৈছে  "অতি দুৰ্ভাগ্যজনক কথাটো হ’ল , চৰকাৰৰ কঠোৰ স্থিতিৰ  বাবেই সংসদৰ বৰ্ষাকালীন অধিৱেশন ব্যাহত হৈছে। মূল্য বৃদ্ধি আৰু  অত্যাৱশ্যকীয় খাদ্য সামগ্ৰীৰ ওপৰত জিএছটিৰ আৰোপ কৰাৰ বিষয়ত চৰকাৰে কোনো আলোচনা নিবিচাৰে। মোডী চৰকাৰে বিৰোধী দলসমূহৰ বিৰুদ্ধে প্ৰতিশোধ ল'বলৈ কেন্দ্ৰীয় সংস্থাসমূহৰ অপব্যৱহাৰ কৰাৰ পদ্ধতিৰ প্ৰতিও আমি আপোনাৰ দৃষ্টি আকৰ্ষণ কৰিব বিচাৰো। আইন সদায়  আইনৰ পথত যাব লাগে। কিন্তু ইয়াকযি ধৰণে  ব্যৱহাৰ কৰা হৈছে সেয়া মানি ল’ব নোৱাৰি।"

পত্ৰখনত এই দুয়োটা বিষয়ৰ প্ৰতি ৰাষ্ট্ৰপতিৰ দৃষ্টি আকৰ্ষণ কৰা হৈছে।ৰাষ্ট্ৰপতিয়ে এই পত্ৰখনৰ উত্তৰ দিয়ে নে নাই লক্ষ্যণীয় হ’ব।