ডিজিটেল ডেস্ক: বাংলাদেশৰ প্ৰধানমন্ত্ৰীৰ পদৰ পৰা পদত্যাগ কৰি ভাৰতলৈ পলায়ন কৰা শ্বেখ হাছিনা বৰ্তমান দিল্লীৰ এক গোপন স্থানত আশ্ৰয় গ্ৰহণ কৰিছে। সদ্যপদত্যাগী প্ৰধানমন্ত্ৰীগৰাকীয়ে বৰ্তমান সাময়িকভাৱে তেওঁ ভাৰতত আশ্ৰয় লৈছে।
ভাৰত চৰকাৰেও হাছিনাক কিছু সময় দিয়াৰ কথা কৈছে যদিও পৰৱৰ্তী পৰ্যায়ত প্ৰধানমন্ত্ৰীগৰাকীৰ পদক্ষেপ কি হ'ব সেই লৈ সৃষ্টি হৈছে অশেষ জল্পনা-কল্পনাৰ। এই পৰ্যন্ত এই সন্দৰ্ভত কোনো আনুষ্ঠানিক ঘোষণা পৰিলক্ষিত হোৱা নাই। কোনো কোনোৰ মতে ব্রিটেইন, আমেৰিকা বা ফিনলেণ্ড হ'ব পাৰে শ্বেখ হাছিনাৰ পৰৱৰ্তী ঠিকনা।
বহুজনে মন্তব্য কৰিছে যে হাছিনাই ঢাকা এৰি যোৱাৰ পিছত লণ্ডনলৈ যাব বিচাৰে। এসময়ত ভগ্নী ৰেহানাৰ সৈতে বাংলাদেশ এৰি গৈছিল শ্বেখ হাছিনা। সম্প্ৰতি ৰেহানা এগৰাকী ব্ৰিটিছ নাগৰিক আৰু তেওঁৰ কন্যা টিউলিপ ব্ৰিটেইনৰ শাসকীয় লেবাৰ পাৰ্টিৰ সাংসদ। সেই সূত্ৰে শ্বেখ হাছিনা ব্ৰিটেইনলৈ যাব বুলি অনুমান কৰা হৈছিল।
জানিবলৈ পোৱা গৈছে যে এতিয়ালৈকে ব্ৰিটেইনৰ পৰা তেনে কোনো সঁহাৰি লাভ কৰা নাই। অন্য ঠিকনা স্থিৰ নোহোৱা লৈ ভাৰতেই হৈ পৰিছে শ্বেখ হাছিনাৰ ঠিকনা। শ্বেখ হাছিনাক কিমান দিনলৈ ভাৰতে আশ্ৰয় প্ৰদান কৰে সেয়া লক্ষ্যণীয় হ'ব।
ভাৰতবৰ্ষই শ্বেখ হাছিনাক আশ্ৰয় প্ৰদান কৰা কাৰ্যই ভৱিষ্যতে ভাৰত বাংলাদেশৰ বৈদেশিক সম্পৰ্কত কেনে প্ৰভাৱ পেলাব সেয়াও এক চিন্তনীয় বিষয় হৈ পৰিছে।
Continue Reading
