কিমান কাৰ্যকৰী ক’ভিড প্ৰতিষেধক? চাওক নতুন তথ্য

নতুন দিল্লী : ক’ভিড প্ৰতিষেধক কিমান কাৰ্যকৰী? এই প্ৰশ্ন বিভিন্ন সময়ত উত্থাপন হৈ আহিছে। আনহাতে কোনবিধ প্ৰতিষেধকৰ কাৰ্যকৰিতা অধিক তাক লৈও প্ৰশ্ন উত্থাপন হৈ আহিছে। প্ৰতিষেধক লোৱাৰ পাছত সংক্ৰমিত হোৱাৰ আশংকা কিমান সেয়াও এক প্ৰশ্নৰ বিষয়। কিন্তু এই সম্পৰ্কত শেহতীয়াকৈ প্ৰকাশ পোৱা এক তথ্যই আশাৰ সঞ্চাৰ কৰিছে।

কেন্দ্ৰীয় স্বাস্থ্য মন্ত্ৰণালয়ৰ এক সূত্ৰই এই সম্পৰ্কত এক আশাপ্ৰদ তথ্য প্ৰকাশ কৰিছে। প্ৰতিষেধক গ্ৰহণ কৰা লোকৰ সংক্ৰমণৰ হাৰ অতি কম হোৱাৰ তথ্য প্ৰকাশ কৰিছে স্বাস্থ্য মন্ত্ৰণালয়ৰ সূত্ৰই। দেশত এতিয়ালৈ প্ৰতিষেধক গ্ৰহণ ৰৰা ৫৩.১৪কোটি লোকৰ ভিতৰত ২.৬ লাখ লোক অর্থাৎ মাত্ৰ ০.০৪৮শতাংশ লোকহে পৰৱৰ্তী সময়ত ক’ভিডত আক্ৰান্ত হৈছে। ইয়াৰে ১,৭১,৫১১জন লোকে ক’ভিড প্ৰতিষেধকৰ এটা পালি গ্ৰহণ কৰিছে। তাৰ বিপৰীতে ৮৭,০৪৯জন দুয়োপালি প্ৰতিষেধক লোৱা লোক পৰৱৰ্তী সময়ত আক্ৰান্ত হোৱাৰ তথ্য পোহৰলৈ আহিছে।

দুয়োপালি প্ৰতিষেধক গ্ৰহণ কৰাৰ পাছত ক’ভিড সংক্ৰমণৰ হাৰ ৫০শতাংশতকৈও অধিক কম হোৱা বুলি প্ৰকাশ পাইছে। ভাৰতত ব্যৱহাৰ হৈ থকা কোভিশ্বিল্ড, কোভাক্সিন, আৰু স্পুটনিক-ভি তিনিওবিধ প্ৰতিষেধকেই ‘ব্ৰেকথ্ৰু সংক্ৰমণ’ৰ পৰা প্ৰায় সমান সুৰক্ষা দি থকা বুলি সূত্ৰটোৱে প্ৰকাশ কৰে।