ডিজিটেল ডেস্কঃ সন্তানে কিবা এটা সুধি আছে আৰু আপুনি ফোনটোলৈ চাই আছে। বন্ধুসকলে আপোনাৰ লগত কথা পাতি আছে, আপোনাৰ মনোযোগ ফোনত। পত্নীয়ে কিবা এটা কৈছে আৰু আপুনি ফোনত মগ্ন হৈ আছে। আলহীয়ে আপোনাক কিবা এটা সুধি আছে আৰু আপুনি ও,আ কৰি ফোন টিপি আছে। যদি আপুনি সঁচাকৈয়ে এনে কৰি আছে তেন্তে এক অতি ভুল কাম কৰি আছে।
এই পৰিস্থিতিক ফোন ফবিং বোলা হয়। ফোন ফবিং মানে ফোনটোৰ সন্মুখত আপোনজনক আওকাণ কৰা। ই বৰ বিপজ্জনক। ইয়াৰ বাবেই মানুহ আপোনাৰ পৰা আঁতৰি গৈ থাকে আৰু আপুনি গমো নাপায়। ফোন ফবিঙে মানুহক অৱহেলিত আৰু অপমানিত বোধ কৰোৱায়।
অষ্ট্ৰেলিয়াৰ চাৰ্লছ ষ্টুয়াৰ্ট বিশ্ববিদ্যালয়ৰ সহকাৰী অধ্যাপক ইয়াছলিম আল ছাগাফে ফবিঙৰ ওপৰত গৱেষণা কৰিছে। আন ১৭০টা গৱেষণা অধ্যয়ন কৰি তেওঁ ‘Psychology of Phubbing’ নামৰ গ্ৰন্থখন ৰচনা কৰে। তেওঁ কিতাপখনত কৈছে যে ফবিং হৈছে আপোনাৰ চৌপাশৰ মানুহক আওকাণ কৰাৰ এক বিকাৰ। শিশুৰ ওপৰত ইয়াৰ আটাইতকৈ বিপজ্জনক প্ৰভাৱ পৰে। তেওঁলোকে বঞ্চিত আৰু অৱহেলিত অনুভৱ কৰিবলৈ আৰম্ভ কৰে। ইয়াৰ বাবে তেওঁলোক হতাশাতো যাব পাৰে।
আপুনিও যদি ফোন ফবিঙত ভুগিছে তেন্তে আজিয়েই সেই অভ্যাস ত্যাগ কৰক, কাৰণ কোনোবাই কথা কৈ থাকোতে মোবাইল ফোন টিপি থাকিলে দেখাতো দৃষ্টিকটু লাগে। এনেকুৱা হলে মানুহে আপোনাৰ পৰা দূৰত্ব বজাই ৰাখিবলৈ বাধ্য হব, ফলত আপুনি লাহে-লাহে আপোন মানুহ কিছুমানক হেৰুৱাব।
Continue Reading
