ক’ভিডৰ দ্বিতীয় ঢৌৰ মাজতে হিমাচলত পৰ্যটকৰ ভিৰ

হিমাচল প্ৰদেশ : উত্তৰ প্ৰদেশৰ গ্ৰীষ্ম প্ৰৱাহৰ সময়তে হিমাচল প্ৰদেশলৈ সোঁত বৈছে পৰ্যটকৰ। দেশত ক’ভিডৰ দ্বিতীয় ঢৌ মাৰ নৌযাওঁতেই হিমাচলৰ ছিমলা, মানালিত ক’ভিড নীতি উলংঘাৰে হাজাৰ হাজাৰ পৰ্যটকৰ সমাগম ঘটিছে। এই সমাগমৰ পৰাই হিমাচলৰ লগতে দেশৰ আন ৰাজ্যতো ক’ভিডৰ সংক্ৰমণ বৃদ্ধিৰ আশংকাৰ সৃষ্টি হৈছে।

ছিমলা, মানালি, ধৰ্মশালাৰ দৰ্শনীয় স্থান, হোটেল, বজাৰ-সমাৰত পৰ্যটকৰ ভিৰে এতিয়া মূৰৰ কামোৰণিৰ সৃষ্টি কৰিছে কেন্দ্ৰীয় চৰকাৰৰ। পৰ্যটকৰ দ্বাৰা ক’ভিড বিধিৰ ব্যাপক উলংঘা সন্দৰ্ভত উত্তৰ বিচাৰি এতিয়া হিমাচল চৰকাৰলৈ পত্ৰ লিখিছে কেন্দ্ৰীয় স্বাস্থ্য মন্ত্ৰণালয়ে। কিন্তু কেন্দ্ৰৰ পত্ৰৰ পাছতো ক’ভিড বিধি বৰ্তাই ৰাখিবলৈ বৰ্তমানলৈকে ব্যৱস্থা গ্ৰহণ কৰা নাই হিমাচল চৰকাৰে।

দৰাচলতে ৰাজ্যখনৰ পৰ্যটন উদ্যোগক পুনৰুজ্জীৱিত কৰিবলৈ জনস্বাস্থ্যৰ সৈতে হেতালি খেলিছে হিমাচলৰ কংগ্ৰেছ চৰকাৰে। হোটেল ব্যৱসায়ীসকলৰ স্বাৰ্থত ক’ভিড বিধি যথেষ্ট শিথিল কৰি দিছে চৰকাৰে। ইয়াৰ বাবে আনকি ৰাজ্যখনলৈ অহা পৰ্যটকসকলৰ বাবে ক’ভিডৰ আৰ চি পি টি আৰ ৰিপ’ৰ্ট থকাতো বাধ্যতামূলক নহয় বুলি ঘোষণা কৰিছে।

দেশত তিনি-চাৰি মাহৰ ভিতৰতে কৰ’নাৰ তৃতীয়টো ঢৌ আহিব বুলি কৈ আহিছে বিশেষজ্ঞসকলে। এনে পৰিপ্ৰেক্ষিতত হিমাচলত পৰ্যটকৰ ভিৰ একপ্ৰকাৰ আত্মঘাতী পদক্ষেপ হিচাপেই চিহ্নিত হৈছে। কোনে জানে এনে জনসমাগমৰ পৰাই দেশত বিয়পি পৰিব পাৰে তৃতীয় ঢৌৰ সৃষ্টি কৰিব বুলি ভবা ডেল্টা প্লাছ কৰ’না।