ক’ভিডক লৈ পুনৰ দেশজুৰি শংকা, উদ্বিগ্নতা; এদিনতে আক্ৰান্ত হ’ল ১২ সহস্ৰাধিক লোক

ডিজিটেল ডেস্ক: ভাৰতত পুনৰ বৃদ্ধি পাবলৈ ধৰিছে ক’ভিড আক্ৰান্তৰ সংখ্যা৷ সাময়িকভাৱে কেইমাহমান ক’ভিডমুক্ত হৈ স্বস্তিৰ জীৱনলৈ উভতি যাবলৈ দেশবাসীয়ে প্ৰয়াস কৰিছিলহে মাথোন, আকৌ ক’ভিডৰ সংক্ৰমণ বৃদ্ধিয়ে উদ্বিগ্ন কৰি তুলিছে দেশবাসীক৷

কেন্দ্ৰীয় স্বাস্থ্য মন্ত্ৰণালয়ৰ তথ্য অনুসৰি ভাৰতত দেওবাৰে ক’ভিডত আক্ৰান্ত হয় ১২,৮৯৯গৰাকী লোক৷ নতুনকৈ সংক্ৰমিত লোকৰ সংখ্যা যোগ হোৱাৰ লগে লগে ভাৰতত এতিয়ালৈ ক’ভিডত আক্ৰান্তৰ সংখ্যা ৪,৩২,৯৬,৬৯২লৈ বৃদ্ধি পালে৷ আনহাতে শেহতীয়া সংক্ৰমিত ৰোগীৰ সংখ্যা ৭২,৪৭৪লৈ বৃদ্ধি হৈছে। একেদৰে, মৃতকৰ সংখ্যা ৫,২৪,৮৫৫লৈ বৃদ্ধি পাইছে আৰু ১৫গৰাকী লোকৰ নতুনকৈ মৃত্যু হৈছে৷

ভাৰতত দৈনিক পজিটিভিটীৰ হাৰ ২.৮৯ শতাংশ আৰু সাপ্তাহিক পজিটিভিটীৰ হাৰ ২.৫০ শতাংশ৷ স্বাস্থ্য মন্ত্ৰণালয়ৰ তথ্য অনুসৰি, ক’ভিডৰ পৰা আৰোগ্য হোৱা লোকৰ সংখ্যা ৪,২৬,৯৯,৩৬৪লৈ বৃদ্ধি হৈছে। মন্ত্ৰণালয়ৰ মতে, দেশজুৰি টিকাকৰণ অভিযানৰ অধীনত দেশত এতিয়ালৈকে ১৯৬.১৪ কোটি ক’ভিড-১৯ ভেকচিন প্ৰদান কৰা হৈছে।