মাৰ্কিন বিমানৰ পৰা সৰি পৰিছিল আফগান খেলুৱৈ

কাবুল : তালিবানে আফগানিস্তান দখল কৰাৰ লগে লগে লাখ লাখ আধুনিক মনস্ক আফগানৰ সপোন থানবান হৈছিল। চৰম হতাশাত ভুগিছিল আফগানিস্তানৰ ৰাষ্ট্রীয় যুৱ ফুটবল দলৰ এজন খেলুৱৈ জাকি আনভাৰিয়েঅ’। ক্ৰীড়াবিৰোধী তালিবানৰ শাসনত ভৱিষ্যতে ফুটবল খেলিবলৈ নাপাব বুলি নিশ্চিত হৈ পৰিছিল ১৭ বছৰীয়া জাকি। সোমবাৰে জাকিয়ে মাৰ্কিন বিমানত উঠি আফগানিস্তান ত্যাগ কৰিবৰ কাবুল বিমান বন্দৰত উপস্থিত হৈছিলগৈ।

কিন্তু কাবুল ত্যাগ কৰিব বিচৰা হাজাৰ হাজাৰ নাগৰিকৰ ভিৰত মাৰ্কিন চি-১৭ বিমানত উঠিব নোৱাৰিলে জাকিয়ে। তালিবানৰ আতংকত ইতিমধ্যে হিতাহিত জ্ঞান হেৰুৱাই পেলাইছিল খেলুৱৈজনে। সেয়ে বিমানৰ চকাৰ ওপৰৰ অংশত ধৰি যাত্ৰা কৰিবলৈ গৈছিল জাকি। বিমানৰ চকাত উঠি যাত্ৰা কৰাতো এজন মানুহৰ বাবে যে অসম্ভৱ জাকিয়ে পাহৰি পেলাইছিল।

বিশাল চি-১৭খন আকাশত উৰাৰ কিছুসময়ৰ পাছতেই তললৈ সৰি পৰিছিল জাকি। বহু উচ্চতাৰ পৰা পৰি কৰুণ মৃত্যুক সাৱটি লৈছিল ফুটবলাৰজনে। ফুটবলক লৈ সপোন থানবান হোৱা জাকিৰৰ জীৱনো চূৰ্ণ-বিচূৰ্ণ হৈছিল। আফগান ফুটবলাৰ জাকিৰৰ ট্ৰেজেদিয়ে এতিয়া শোকাহত কৰিছে বিশ্বৰ ক্ৰীড়াপ্ৰেমীক।