৩৬৫ দিনৰ পাছত মণিপুৰত নতুন চৰকাৰ, হিংসাজৰ্জৰ ৰাজ্যত ৰাষ্ট্ৰপতি শাসন প্ৰত্যাহাৰ

ডিজিটেল ডেস্ক : বিজেপিৰ মণিপুৰৰ ত্ৰয়োদশ মুখ্যমন্ত্ৰীৰূপে নেতা যুমনাম খেমচান্দ সিঙে কালি শপত গ্ৰহণ কৰে। ৰাজ্যপাল অজয় কুমাৰ ভাল্লাই কালি সন্ধিয়া লোকভৱনত ৬২ বছৰীয়া খেমচান্দ সিঙক ৰাজ্যখনৰ মুখ্যমন্ত্ৰীৰূপে পদ আৰু গোপনীয়তাৰ শপতবাক্য পাঠ কৰোৱায়।

খেমচান্দ সিং মেইটেই সম্প্ৰদায়ৰ। তেওঁৰ লগত নগা সম্প্ৰদায়ৰ লোধী ডিখ'ই উপ-মুখ্যমন্ত্ৰীৰূপে শপত গ্ৰহণ কৰে। ডিখ' নগা পীল্লছ ফ্ৰণ্টৰ বিধায়ক। আনহাতে কুকী সম্প্ৰদায়ৰ নেতা নেমচা কিপগেনেও উপ-মুখ্যমন্ত্ৰীৰূপে শপত গ্ৰহণ কৰে। 

নেমচাই দিল্লীত থকা মণিপুৰ ভৱনৰ পৰা ভিডিঅ' কনফাৰেন্সিঙৰ জৰিয়তে শপতবাক্য পাঠ কৰে। বিজেপিৰ গোবিন্দদাস কন্থৌজাম আৰু এন পি পিৰ কে লোকেন সিঙেও কালি ৰাজ্যখনৰ মন্ত্ৰীৰূপে শপত গ্ৰহণ কৰে। ৰাষ্ট্ৰপতি দ্রৌপদী মুর্মুয়ে ৰাজ্যখনৰ পৰা ৰাষ্ট্ৰপতিৰ শাসন প্রত্যাহাৰ কৰাৰ পাছত নতুন মন্ত্রীসভাই শপত গ্রহণ কৰে। শপত গ্রহণ অনুষ্ঠানত বিজেপিৰ কেইবাজনো বিধায়ক, বিজেপি তথা এন ডি এৰ জ্যেষ্ঠ নেতাসকল উপস্থিত আছিল। উল্লেখযোগ্য যে ৰাজ্যখনত ৩৫৬ দিনৰ পাছত ৰাষ্ট্ৰপতিৰ শাসন প্রত্যাহাৰ কৰা হয়। ৰাজ্যখনত মেইটেই আৰু কুকী সম্প্ৰদায়ৰ মাজত চলা ভয়াৱহ গোষ্ঠীগত সংঘর্ষ চলি থকাৰ সময়তে যোৱা বছৰ ৯ ফেব্ৰুৱাৰীত তেতিয়াৰ মুখ্যমন্ত্ৰী এন বীৰেন সিঙে পদত্যাগ কৰে। ইয়াৰ চাৰি দিনৰ পাছত যোৱা বছৰ ১৩ ফেব্ৰুৱাৰীত ৰাজ্যখনত ৰাষ্ট্ৰপতিৰ শাসন বলবৎ কৰা হয়। 

উল্লেখযোগ্য যে মঙলবাৰে নতুন দিল্লীত মণিপুৰৰ বিজেপিৰ বিধায়কসকলৰ এখন বৈঠক অনুষ্ঠিত হয়। এই বৈঠকতে খেমচান্দ সিঙক দলটোৰ বিধায়িনী দলৰ নেতা নির্বাচিত কৰা হয়। পাছত কালি এন ডি এৰ বিধায়িনী দলৰ এখন বৈঠকত তেওঁৰ নামটোত অনুমোদন জনোৱাৰ লগতে উপ-মুখ্যমন্ত্রীৰূপে ডিখ' আৰু নেমচাৰ নামত সন্মতি জনোৱা হয়। খেমচান্দ সিং পূৰ্বৰ মুখ্যমন্ত্ৰী বীৰেন সিঙৰ ঘনিষ্ঠ বুলি জনা যায়। দিল্লীত অনুষ্ঠিত বিজেপি বিধায়িনী দলৰ বৈঠকত দলটোৰ ৩৭জন বিধায়কৰ ভিতৰত ৩৫জন উপস্থিত আছিল। ইয়াৰ পাছতে মণিপুৰ ভৱনত অনুষ্ঠিত এন ডি এৰ বিধায়কসকলৰ বৈঠকত তিনিজন নির্দলীয় বিধায়ককে ধৰি সহযোগী দলকেইটাৰ বিধায়কসকল উপস্থিত আছিল। উল্লেখযোগ্য যে খেমচান্দ সিং পশ্চিম ইম্ফলৰ বিধায়ক আৰু তেওঁ ২০১৭-২২ সময়ছোৱাত বিধানসভাৰ অধ্যক্ষ আছিল। 

২০২২ চনত বীৰেন সিং চৰকাৰৰ দ্বিতীয়টো কার্যকালত তেওঁ মন্ত্ৰীৰূপে শপত গ্রহণ কৰে। তেওঁ ৰাজ্যখনত শান্তি স্থাপনত সক্রিয় ভূমিকা পালন কৰি আহিছে। ৰাজ্যখনত ২০২৩ চনৰ ৩ মে'ৰ পৰা আৰম্ভ হোৱা গোষ্ঠীগত হিংসাত কমেও ২৬০জন নিৰীহ লোকৰ লগতে নিৰাপত্তা বাহিনীৰ লোক নিহত হয় আৰু কেইবা হাজাৰ লোক গৃহহীন হৈ পৰে।

উৎসঃ দৈনিক জনমভূমি