মহানগৰীত গৃহবন্দী ৫০ লাখ বাসিন্দা! কিহৰ বাবে এই কঠোৰতা?

ছীডনী : অষ্ট্ৰেলিয়াৰ সৰ্ববৃহৎ মহানগৰ ছীডনীত অধিক কটকটীয়া কৰি তোলা হৈছে লকডাউন। কোভিড-১৯ৰ সংক্ৰমণ অভিলেখ হাৰত বৃদ্ধি পোৱাৰ পাছত অধিক কঠোৰ ৰূপত বলৱৎ কৰা হৈছে লকডাউন। দেশখনৰ প্ৰশাসনে কোভিডৰ ডেল্টা প্ৰকাৰৰ সংক্ৰমণ নিয়ন্ত্ৰণহীন অৱস্থালৈ গতি কৰাৰ আশংকা ব্যক্ত কৰিছে।

‘অতি জৰুৰী পৰিস্থিতিৰ সৃষ্টি নোহোৱালৈকে ঘৰৰ পৰা বাহিৰ নোলাব।’ ছীডনী প্ৰশাসনৰ মুৰব্বী গ্লাডেইজ বেৰেজিকলিয়ানে ছিডনীৰ ৫০ লাখ বাসিন্দাৰ উদ্দেশ্যি এই আহ্বান জনায়। বিগত ২৪ ঘণ্টাত মহানগৰখনত ৪৪জন নতুন আক্ৰান্ত চিনাক্ত হোৱাৰ পাছতে এই তৎপৰতা প্ৰদৰ্শন কৰিছে ছীডনী প্ৰশাসনে। ছীডনীত বলৱৎ হৈ থকা লকডাউনে তৃতীয় সপ্তাহত ভৰি দিছে যদিও মহানগৰখনত কোভিডৰ সংক্ৰমণ ক্ৰমাৎ বৃদ্ধি পাই থকা পৰিলক্ষিত হৈছে। মহামাৰী আৰম্ভ হোৱাৰ সময়ৰ ভিতৰতে ছীডনীত আটাইতকৈ জটিল পৰিস্থিতি সৃষ্টি হোৱা বুলি অভিহিত কৰি দেশখনে ঘৰতে থকাৰ নীতি কঠোৰভাৱে বলৱৎ কৰিছে।