ডিজিটেল ডেস্কঃ হায়দৰাবাদৰ এজন ডাক্তৰ আৱেগিক হৈ পৰিল যেতিয়া এটা ৬ বছৰীয়া নিস্পাপ শিশুৱে তেওঁক কৈছিল যে ডাক্তৰ, মোৰ কেন্সাৰ হৈছে, অনুগ্ৰহ কৰি মোৰ মা-দেউতাক এই বিষয়ে নক’ব। বেদনাদায়ক কাহিনীটোৰ আন এটা আৱেগিক দিশ হ’ল এই ক্ষেত্ৰত শিশুটিৰ পিতৃ-মাতৃয়েও চিকিৎসকক অনুৰোধ কৰিছিল যে আমাৰ ল'ৰাটোৰ কেন্সাৰ হৈছে, সেই কথা যেন ল'ৰাটোক নজনায়।
হায়দৰাবাদৰ এপ’ল’ হাস্পতালত কৰ্মৰত স্নায়ু বিশেষজ্ঞ ডাঃ সুধীৰ গুপ্তাই নিজৰ টুইটাৰ একাউণ্টৰ জৰিয়তে বিশ্ববাসীৰ সৈতে এই হৃদয়বিদাৰক কাহিনী শ্বেয়াৰ কৰিছে। মানুহৰ সংবেদনশীলতাক অতি ভালদৰে বুজি পোৱা ডাক্তৰজনে কয় যে সৰু শিশু এটাই ইমান ডাঙৰ আৰু গুৰুতৰ কথা এটা অতি সহজে কোৱা শুনি তেওঁ আচৰিত হৈছিল।
শিশুটিয়ে ডাঃ সুধীৰ গুপ্তাক কৈছিল- ''ডাক্তৰ ছাৰ, মই জানো মোৰ কেন্সাৰ হৈছে। এই ৰোগৰ কথা মই ইণ্টাৰনেটত পঢ়িছো। প্লিজ মোৰ মাক-দেউতাক এই বিষয়ে একো নক'ব। তেওঁলোক মোৰ কাৰণে বিচলিত হ’ব। দুয়ো মোক বহুত ভাল পায়, প্লিজ তেওঁলোকক একো নক'ব।''
ডাঃ সুধীৰে কয় যে মগজুৰ কৰ্কট ৰোগৰ বাবে মনু নামৰ শিশুটিৰ অস্ত্ৰোপচাৰ কৰা হৈছে। পিতৃ-মাতৃৰ অনুৰোধত তেওঁ সেই শিশুটিক অ’পিডিত লগ পাইছিল। ডাঃ সুধীৰে কৈছিল, ‘মই পিতৃ-মাতৃৰ কথা মানি মনুক মাত দিলোঁ। শিশুটি হুইল চেয়াৰত বহি আছিল। তাৰ হাঁহিভৰা মুখখন আত্মবিশ্বাসেৰে ভৰি আছিল। ডাঃ সুধীৰে লগতে কয় যে এটা সৰু ল’ৰাই পিতৃ-মাতৃৰ প্ৰতি যি ধৰণেৰে মৰম আৰু কেয়াৰ দেখুৱাইছিল, সেইটোৱে মোক আৱেগিক আৰু আচৰিত কৰি তুলিছিল। ডাঃ সুধীৰে এই ঘটনাত চকুলো ওলোৱা বুলিও কয়।
এই টুইটটো পঢ়ি নেটিজেনসকলে মনুৰ আশু আৰোগ্য কামনা কৰি প্ৰাৰ্থনা জনাইছে।
Continue Reading
