মৃত্যু এতিয়া সহজ! কাবুল বিমানবন্দৰত মৃত্যু ৭ আফগানৰ

কাবুল : তালিবান অধ্যুষিত আফগানিস্তানত এতিয়া মৃত্যু সহজ সত্যত পৰিণত হৈছে। প্ৰায় নিয়মীয়াকৈ তাত আফগান সাধাৰণ নাগৰিকৰ প্ৰাণ যোৱাৰ ঘটনা সংঘটিত হৈছে। তালিবানৰ সন্ত্ৰাসৰ পৰা ৰক্ষা পাবলৈ বিভিন্নজন লোকে দেশখনৰ পৰা পলাবলৈ চেষ্টা কৰাৰ সময়তে তালিবানে বাধা দিয়াৰ চেষ্টা কৰিছে আৰু একধৰণৰ অস্থিৰ পৰিস্থিতিৰ মাজত ভালেমান লোকে প্ৰাণ হেৰুৱাবলগীয়া হৈছে।

দেওবাৰে কাবুল এয়াৰপোৰ্টত প্ৰাণ হেৰুৱালে সাতজনকৈ আফগান নাগৰিকে। দেশখনৰ পৰা পলাবলৈ চেষ্টা কৰাৰ সময়তে সৃষ্টি হোৱা বিশৃংখল পৰিস্থিতিৰ মাজতে এইসকল লোকে প্ৰাণ হেৰুৱায়। ব্ৰিটিছ প্ৰতিৰক্ষা মন্ত্ৰণালয়ৰ এগৰাকী মুখপাত্ৰই এইকথা প্ৰকাশ কৰে। তেওঁ কয়, অনিয়ন্ত্ৰিত ভিৰৰ মাজত আকস্মিকভাৱে প্ৰাণ হেৰুৱাবলগীয়া হোৱা সাতজনকৈ আফগান নাগৰিকৰ পৰিয়ালৰ প্ৰতি আমাৰ সমবেদনা জনাইছোঁ।

দেশখনৰ পৰা পলাবলৈ চেষ্টা কৰি কাবুল বিমানবন্দৰত ভিৰ কৰা হাজাৰ হাজাৰ লোকক নিয়ন্ত্ৰণ কৰিবলৈ মাৰ্কিন সামৰিক বাহিনী আৰু তেওঁলোকৰ সহযোগীসকলে চেষ্টা কৰি আছে যদিও পৰিস্থিতি চম্ভালাতো অতি প্ৰত্যাহ্বানজনক হৈ পৰিছে। তালিবানৰ ভয়ত নিজৰ প্ৰাণৰ মায়াকো পৰিত্যাগ কৰা একাংশ লোকে এতিয়া দেশ এৰাৰ চেষ্টাত কৰুণ মৃত্যুক আকোঁৱালি লবলগীয়া হৈছে।