ডিজিটেল ডেস্কঃ কিন্নৰ সমাজৰ লোকসকলক সবল কৰি স্ব-নিৰ্ভৰশীল কৰি তোলাৰ উদ্দেশ্যে মুম্বাইত কিন্নৰসকলৰ বাবে এখন চেলুন আৰম্ভ কৰা হৈছে। এই চেলুনখন ৭ জন কিন্নৰৰ দ্বাৰা পৰিচালিত হ’ব।
‘কিন্নৰ’ সম্প্ৰদায়ৰ লোকসকলে আজিও নিয়মিতভাৱে বহু বৈষম্যৰ সন্মুখীন হ’বলগীয়া হয়। নিজৰ অস্তিত্ব আৰু সম অধিকাৰৰ বাবে অহৰহ যুঁজ দিয়াৰ পাছতো কিন্নৰসকলে নিজৰ লক্ষ্য সম্পূৰ্ণৰূপে পূৰণ কৰিব পৰা নাই। অৱশ্যে কিছুমানে নিজৰ মূল্য প্ৰমাণ কৰি সেই ঠেক পৰিগণ্ডী সমূহ ভাঙি পেলাইছে।
এই অনন্য চেলুনখনৰ স্বত্বাধিকাৰী জয়নাব নিজেই এগৰাকী কিন্নৰ সমাজৰ সদস্য। কিন্নৰ সমাজৰ জনসাধাৰণক সবল কৰি তোলাৰ বাবে এই পদক্ষেপ অতি গুৰুত্বপূৰ্ণ বুলি উল্লেখ কৰে চেলুনখনৰ স্বতাধিকাৰী জয়নাবে।
জয়নাবে কয় যে চেলুনখনে কিন্নৰসকলক প্ৰশিক্ষণৰ লগতে কৰ্মসংস্থাপন প্ৰদানৰ বাবেও উৎসৰ্গিত। ডয়চে বেংক আৰু বম্বে ৰটাৰী ক্লাবৰ সহযোগত এই কিন্নৰসকলৰ চেলুনখন মুকলি কৰা হয়।
যিখন সমাজত কিন্নৰ সম্প্ৰদায়ক অত্যধিক পৃথক আৰু প্ৰান্তীয় বুলি গণ্য কৰা হয়, সেইখন সমাজত এই সৰু পদক্ষেপটোৱে সম্প্ৰদায়টোৰ বাবে এক বিশাল পদক্ষেপ হিচাপে পৰিগণিত হৈছে।
Continue Reading
