৫ ভাৰতীয়ৰ দেহত 'নিপা' ভাইৰাছ, এছিয়াৰ বিমান বন্দৰত বিশেষ পৰীক্ষণ

ডিজিটেল ডেস্ক : কভিডৰ পাছত এইবাৰ ভাৰতত 'নিপা ভাইৰাছ'ৰ সংক্ৰমণ ঘটিছে। ইতিমধ্যে পশ্চিম বংগত পাঁচজন লোকৰ শৰীৰত এই ভাইৰাছৰ সংক্ৰমণ ধৰা পৰিছে। অতি মাৰাত্মক এই ভাইৰাছত মানুহৰ মৃত্যুৰ হাৰ বহু বেছি হোৱাৰ লগতে ইয়াৰ কোনো প্রতিষেধকো বর্তমানলৈকে ওলোৱা নাই। 

ভাৰতৰ কভিড-১৯ৰ কৰ্মৰত গ্ৰুপৰ অধ্যক্ষ তথা এইমছ বিলাসপুৰৰ অধ্যক্ষ ডাঃ নৰেন্দ্ৰ কুমাৰ অৰোৰাই বৰ্তমানলৈকে ভাৰতত এই ভাইৰাছ নিয়ন্ত্ৰণত আছে বুলি প্রকাশ কৰিছে। পাঁচজন লোকৰ শৰীৰত নিপা ভাইৰাছৰ সংক্ৰমণ পোৱাৰ পাছত যোৱা কেইদিনত এই লোকসকলৰ সংস্পৰ্শলৈ অহা লোকসকলৰ স্বাস্থ্য পৰীক্ষাৰ ব্যৱস্থা কৰিছে স্বাস্থ্য মন্ত্র্যালয়ে। 

ইফালে ভাৰতত নিপা ভাইৰাছৰ সংক্ৰমণৰ তথ্য লাভ কৰাৰ পাছতে এছিয়াৰ বহুকেইখন দেশে বিমান বন্দৰত স্বাস্থ্য পৰীক্ষাৰ ব্যৱস্থা কৰিছে। থাইলেণ্ড, নেপাল, টাইৱান, চীন আদি দেশে কভিডৰ সময়ৰ দৰে বিমান বন্দৰত উচ্চ স্তৰৰ স্বাস্থ্য পৰীক্ষা আৰু যাত্ৰীক নির্দিষ্ট সময় নিৰীক্ষণত ৰক্ষাৰ ব্যৱস্থা হাতত লৈছে।