ডিজিটেল ডেস্কঃ নিসংগতাই মানুহক কেতিয়াবা বৰকৈ দুখ দি যায়। মনৰ কথা কাকো খুলি ক’ব নোৱাৰাৰ দুখত বুকুৰ ভিতৰতে কথাবোৰ জমা হৈ হৈ বুকুৰ বিষ বঢ়ায়। সকলো মানুহেই সংগী বিচাৰে। আপোন মানুহৰ সুখ দুখৰ সংগী হৈ জীৱনটো একেলগে উপভোগ কৰিব বিচাৰে। বিশেষকৈ জীৱনৰ এটা বয়সত মানুহে একাকীত্বত ভুগে, যিয়ে মানুহক হতাশ কৰি তোলে। নিংসগতা দূৰ কৰিবলৈকে এজন ৬২ বছৰীয়া ব্যক্তিয়ে ৫৪ বছৰীয়া এগৰাকী মহিলাক বিয়া কৰায়।
বাংলাদেশৰ বনাৰিপাৰা উপজিলাৰ চাখৰ ইউনিয়নৰ সোণাহৰ গাঁৱত প্ৰধানমন্ত্ৰী আশ্ৰয় প্ৰকল্পত অনুষ্ঠিত হোৱা এই বিয়াখনত হাজাৰ হাজাৰ লোক উপস্থিত আছিল।দৰাৰ নাম আশ্ৰফ আলী আৰু কইনাৰ নাম বানু বেগম। আশ্ৰফ আলী আছিল অবিবাহিত আৰু বানু বেগম আছিল স্বামীহীনা। বানুৰ এজনী কন্যা আছে আৰু আশ্ৰফ আলী আছিল একেবাৰে অকলশৰীয়া।
হঠাতে পৰিচয় ঘটে দুয়োৰে। সেই পৰিচয়ে ক্ৰমে ঘনিষ্ঠতাৰ ৰূপ লয়। দুয়ো নিজকে বৰ নিসংগ যেন অনুভৱ কৰিছিল। এই নিংসগতা দূৰ কৰিবলৈকে দুয়ো দুয়োৰে সংগী হোৱাৰ সিদ্ধান্ত লয়। নানা বাধা অতিক্ৰম কৰি দুয়ো এক হোৱাৰ সিদ্ধান্ত ল’লে। অৱশেষত তেওঁলোকৰ বিবাহ অতি আড়ম্বৰপূৰ্ণ পৰিৱেশত সম্পন্ন হৈ যায়। জীৱনৰ বাকী থকা কালছোৱা একেলগে উপভোগ কৰাৰ বাবে দুয়ো সিদ্ধান্ত লয়।
আশ্ৰফ আলীয়ে নিসংগ জীৱন কটাই আমনি পোৱা হৈছিল। তেওঁ অৱশেষত উপলব্ধি কৰিলে যে মানুহক সংগীৰ বৰ প্ৰয়োজন। সেয়েহে ৬২ বছৰ হ'ল যদিও মনে মিলা এগৰাকী মহিলাক বিয়া পাতিবৰ বাবে তেওঁ আগবাঢ়ি আহিল। আশ্ৰফ আলী আৰু বানু বেগমে সুখী বৈবাহিক জীৱনৰ বাবে সকলোৰে পৰা আশীৰ্বাদ কামনা কৰে। উপস্থিত থকা সকলো লোকেই দুয়োকে যুগ্ম জীৱনৰ আশীৰ্বাদ আৰু শুভকামনা জ্ঞাপন কৰে।
Continue Reading
