ডিজিটেল ডেস্ক: নিৰ্বাচন সমাগত৷

Listen to Article

2 min read

80%

ডিজিটেল ডেস্ক: নিৰ্বাচন সমাগত৷ নিৰ্বাচনৰ পূৰ্বে পুনৰ দামবৃদ্ধিৰ বোজা সহিবলগীয়া হৈছে নাগৰিকে৷ আজিৰে পৰা বৃদ্ধি পালে ৰন্ধন গেছ চিলিণ্ডাৰৰ দাম৷ চৰকাৰী তেল বিপণন কোম্পানীবোৰে আজিৰে পৰা কাৰ্যকৰী হোৱাকৈ ১৯ কিলোগ্ৰাম বাণিজ্যিক এলপিজি গেছ চিলিণ্ডাৰৰ দাম ২৫ টকাকৈ বৃদ্ধি কৰিছে।

শেহতীয়া দামবৃদ্ধিৰ সৈতে দিল্লীত ১৯ কিলোগ্ৰাম বাণিজ্যিক গেছ চিলিণ্ডাৰৰ খুচুৰা দাম হৈছে ১,৭৯৫ টকা৷ মুম্বাইত আজিৰে পৰা ১৯ কিলোগ্ৰামৰ চিলিণ্ডাৰ ১,৭৪৯ টকাত বিক্ৰী কৰা হ’ব। আৰু, চেন্নাই আৰু কলকাতাত বাণিজ্যিক এলপিজি গেছ চিলিণ্ডাৰৰ দাম হৈছেগৈ ক্ৰমান্বয়ে ১,৯৬০ টকা আৰু ১,৯১১ টকা৷

একেৰাহে দ্বিতীয়বাৰৰ বাবে চৰকাৰী প্ৰতিষ্ঠানবোৰে বাণিজ্যিক গেছ চিলিণ্ডাৰৰ ব্যয় বৃদ্ধি কৰিছে। ১ ফেব্ৰুৱাৰীত ১৯ কিলোগ্ৰাম গেছ চিলিণ্ডাৰৰ দাম ১৪ টকা বৃদ্ধি হৈছিল। ফেব্ৰুৱাৰীত ১৯ কিলোগ্ৰাম গেছ চিলিণ্ডাৰৰ দাম আছিল ক্ৰমান্বয়ে ১,৭৬৯.৫০টকা (দিল্লী), ১,৮৮৭ টকা (কলকাতা), ১,৭৩৭ টকা (মুম্বাই) আৰু ১,৯৩৭ টকা (চেন্নাই)।

তেল কোম্পানীবোৰে ২০২৩ চনৰ ১ ডিচেম্বৰত দেশৰ বিভিন্ন স্থানত ২১ টকাকৈ বাণিজ্যিক গেছ চিলিণ্ডাৰৰ হাৰ বৃদ্ধি কৰিছিল।

অৱশ্যে, ২০২৪ নৱবৰ্ষৰ প্ৰাকমুহূৰ্তত ১৯ কিলোগ্ৰাম বাণিজ্যিক ৰন্ধন গেছৰ মূল্য প্ৰতি চিলিণ্ডাৰত ৩৯.৫০ টকাকৈ হ্ৰাস কৰা হৈছিল।

দেশৰ কেইবাখনো মহানগৰত আজিৰ দিনটোত বাণিজ্যিক চিলিণ্ডাৰৰ দাম এনেধৰণৰ:

• দিল্লী: ১,৭৯৫ টকা

• মুম্বাই: ১,৭৪৯ টকা

• কলকাতা: ১,৯১১ টকা

• চেন্নাই: ১,৯৬০ টকা

• চণ্ডীগড়: ১,৮১৬ টকা

• বেংগালুৰু: ১,৮৭৫ টকা

• ইন্দোৰ: ১,৯০১ টকা

• অমৃতসৰ: ১,৮৯৫ টকা

• জয়পুৰ: ১,৮১৮ টকা