নিৰ্বাচনী তথ্য গোপন কৰাৰ ষড়যন্ত্ৰ মোদী চৰকাৰৰ; নিৰ্বাচনী বিধি, ১৯৬১ৰ সংশোধনকলৈ বিস্ফোৰণ কংগ্ৰেছৰ

অধিবক্তা মাহমুদ প্ৰাচাৰৰ আবেদনৰ ভিত্তিত পঞ্জাৱ আৰু হাৰিয়ানা উচ্চ ন্যায়ালয়ে   হাৰিয়ানা বিধানসভা নিৰ্বাচনৰ সৈতে জড়িত সকলো ভিডিঅ’ ৰেকৰ্ড আবেদনকাৰীৰ হাতত গতাই দিব লাগে বুলি ৰায়দান দিছিল। ইয়াৰ পিছত কেন্দ্ৰই নিৰ্বাচনী বিধি সংশোধন কৰে। এই সংশোধনী অনুসৰি জনসাধাৰণে বুথৰ চিচিটিভি ফুটেজ, ৱেবকাষ্টিং ফুটেজ আৰু প্ৰাৰ্থীসকলৰ ভিডিঅ’ ৰেকৰ্ডিং পৰীক্ষা কৰাৰ সুযোগ নাপাব। আদালতৰ নিৰ্দেশৰ প্ৰতি লক্ষ্য ৰাখি আইন মন্ত্ৰালয় আৰু নিৰ্বাচন আয়োগৰ বিষয়াসকলে এই পদক্ষেপ গ্ৰহণ কৰিছে। এই ফুটেজসমূহৰ অপব্যৱহাৰ ৰোধ কৰিবলৈ এই ব্যৱস্থা কৰা হৈছে বুলি সদৰি কৰে।

এই সন্দৰ্ভত মল্লিকাৰ্জুন খৰ্গে কয় যে পূৰ্বতে কেন্দ্ৰই নিৰ্বাচন আয়ুক্ত নিযুক্তি সমিতিৰ পৰা মুখ্য ন্যায়াধীশক বাদ দিছিল। এইবাৰ উচ্চ ন্যায়ালয়ৰ নিৰ্দেশৰ পৰিপ্ৰেক্ষিতত নিৰ্বাচনী তথ্য গোপন কৰাৰ ব্যৱস্থা কৰা হ’ল৷ যেতিয়াই কংগ্ৰেছে নিৰ্দিষ্ট নিৰ্বাচনী অনিয়মৰ সন্দৰ্ভত আয়োগৰ কাষ চাপিছে, তেতিয়াই আয়োগে বষয়টো পেলাই থয়। আয়োগে গুৰুতৰ অভিযোগকো আওকাণ কৰে বুলি অভিযোগ কৰে। তেওঁৰ আৰু কয় যে এইটোৱে পুনৰ প্ৰমাণ কৰে যে অৰ্ধ-ন্যায়িক সংস্থা হোৱাৰ পিছতো আয়োগে নিৰপেক্ষভাৱে কাম কৰা নাই। আয়োগৰ নিৰপেক্ষতা হ্ৰাস কৰিবলৈ মোদী চৰকাৰৰ এয়া প্ৰত্যক্ষ আক্ৰমণ তথা সংবিধান আৰু গণতন্ত্ৰৰ ওপৰতো আক্ৰমণ। সংবিধান আৰু গণতন্ত্ৰ ৰক্ষাৰ বাবে আমি সকলো ব্যৱস্থা গ্ৰহণ কৰা হ’ব বুলি কংগ্ৰেছ নেতাগৰাকীয়ে উল্লেখ কৰে।