ডিজিটেল ডেস্ক: লোকসভা নিৰ্বাচনৰ পূৰ্বেই কাৰ্যতঃ বিৰোধী মিত্ৰজোঁট ‘ইণ্ডিয়া’ত স্পষ্ট হৈ পৰিল বিভাজন৷ আনকি, নিৰ্বাচনৰ সময়লৈ এই মিত্ৰজোঁট তিষ্ঠি থাকিবগৈনে তাক লৈও সংশয়ৰ সৃষ্টি হৈছে৷ কংগ্ৰেছৰ ভুল নীতিৰ বাবেই বিৰোধী মিত্ৰজোঁট ‘ইণ্ডিয়া’ত বিভাজনৰ সৃষ্টি হৈছে৷
বিগত বৰ্ষৰ ১৯ ডিচেম্বৰৰ অশোক হোটেলত অনুষ্ঠিত বৈঠকত মল্লিকাজুন খৰ্গেক ‘ইণ্ডিয়া’ৰ নেতা নিৰ্বাচিত কৰাৰ পাছৰে পৰা ক্ৰমশঃ মিত্ৰজোঁটৰ পৰা আঁতৰি আহিছিল নীতিশ কুমাৰ৷ নীতিশ কুমাৰক ‘ইণ্ডিয়া’ৰ নেতা নিৰ্বাচিত নকৰাত অসন্তুষ্টি বৃদ্ধি পাইছিল৷ আৰু ফলশ্ৰুতিত চলে-বলে-কৌশলে বিহাৰত চৰকাৰ গঠন কৰিলে এনডিএই৷
অকল নীতিশ কুমাৰেই নহয়, ‘ইণ্ডিয়া’ মিত্ৰজোঁটৰ অন্যতম প্ৰভাৱশালী নেত্ৰী মমতা বেনাৰ্জীয়েও ‘ইণ্ডিয়া’ মিত্ৰজোঁটৰ বিৰুদ্ধে সৰব হৈ পৰা দেখা গৈছিল৷ মমতাৰ তৃণমূল কংগ্ৰেছেও পশ্চিমবংগত এককভাৱে নিৰ্বাচনত অৱতীৰ্ণ হোৱাৰ কথা ঘোষণা কৰাৰ লগতে মুৰ্ছিদাবাদৰ এখন বিশাল জনসভাত কংগ্ৰেছে ৪০খন আসনো জিকিব নোৱাৰে বুলি মন্তব্য কৰিছিল৷
নীতিশ, মমতাৰ পাছত এইবাৰ ‘ইণ্ডিয়া’ মিত্ৰজোঁটৰ বিৰুদ্ধে ক্ষোভত ফাটি পৰিছে সমাজবাদী পাৰ্টিৰ মুৰব্বী অখিলেশ সিং৷ ৰাহুল গান্ধীৰ নেতৃত্বত চলি থকা ‘ভাৰত জোড়ো ন্যায় যাত্ৰা’লৈ আমন্ত্ৰণ নোপোৱাক লৈ তীব্ৰ অসন্তুষ্টি ব্যক্ত কৰিছে অখিলেশে৷ কংগ্ৰেছৰ বিৰুদ্ধে এইবাৰ মুকলিকৈ ক্ষোভ উজাৰিছে অখিলেশ সিং যাদৱে৷ কংগ্ৰেছৰ ভুল নীতিৰ বাবেই ‘ইণ্ডিয়া’ মিত্ৰজোঁটত বিভাজন তীব্ৰ হ’ব পাৰে বুলি মন্তব্য কৰিছে অখিলেশ সিং যাদৱে৷
Continue Reading
