অসম কেবিনেটৰ সম্প্ৰসাৰণ: ১২ গৰাকী নতুন মন্ত্ৰীৰ শপত গ্ৰহণ, ১৭ জনলৈ বৃদ্ধি পালে মন্ত্ৰীৰ সংখ্যা

ডিজিটেল ডেস্ক: অসম চৰকাৰৰ মন্ত্ৰীসভাৰ নতুন সম্প্ৰসাৰণ ঘটাই আজি ১২ গৰাকী বিধায়কে মন্ত্ৰী হিচাপে শপত গ্ৰহণ কৰে। জ্যোতি-বিষ্ণু কলা মন্দিৰত অনুষ্ঠিত এক গাম্ভীৰ্যপূৰ্ণ অনুষ্ঠানত ৰাজ্যপাল লক্ষ্মণ প্ৰসাদ আচাৰ্যই নতুন মন্ত্ৰীসকলক শপত বাক্য পাঠ কৰোৱায়।

আজি মন্ত্ৰীৰূপে শপত লোৱা বিধায়কসকল হ’ল— অশ্বিনী ৰায় সৰকাৰ, বিমল বড়া, অশোক সিংহল, বিশ্বজিৎ দৈমাৰী, জয়ন্ত মল্লবৰুৱা, কৌশিক ৰায়, কেশৱ মহন্ত, কৃষ্ণেন্দু পাল, নীলিমা দেৱী, পীযূষ হাজৰিকা, ডাঃ ৰণোজ পেগু আৰু সুশান্ত বৰগোহাঁই।

শপতগ্ৰহণ অনুষ্ঠানত ভাষাৰ এক সুন্দৰ প্ৰতিফলন দেখা পোৱা যায়। অশ্বিনী ৰায় সৰকাৰ, অশোক সিংহল আৰু বিশ্বজিৎ দৈমাৰীয়ে অসমীয়া ভাষাত শপত লোৱাৰ বিপৰীতে বিমল বড়াই সংস্কৃত ভাষাত শপত বাক্য পাঠ কৰে।

মুখ্যমন্ত্ৰী হিমন্ত বিশ্ব শৰ্মাৰ এইবাৰৰ মন্ত্ৰীসভাত ৫ গৰাকী নতুন মন্ত্ৰীয়ে স্থান লাভ কৰিছে। ইয়াৰে ৪ গৰাকী একেবাৰে নতুন মুখ হোৱাৰ বিপৰীতে এগৰাকী পূৰ্বৰ অধ্যক্ষ। তেওঁলোক হ’ল: ৰামেশ্বৰ তেলী, নীলিমা দেৱী, সুশান্ত বৰগোহাঁই, অশ্বিনী ৰায় সৰকাৰ, বিশ্বজিৎ দৈমাৰী (পূৰ্বৰ বিধানসভাৰ অধ্যক্ষ)।

উল্লেখ্য যে, যোৱা ১২ মে’ত মুখ্যমন্ত্ৰী হিমন্ত বিশ্ব শৰ্মাৰ সৈতে ৰামেশ্বৰ তেলী, অজন্তা নেওগ, অতুল বৰা আৰু চৰণ বড়োৱে প্ৰথম পৰ্যায়ত শপত গ্ৰহণ কৰিছিল। আজিৰ এই নতুন ১২ গৰাকী মন্ত্ৰীৰ অন্তৰ্ভুক্তিয়ে অসম কেবিনেটৰ মুঠ মন্ত্ৰীৰ সংখ্যা (মুখ্যমন্ত্ৰীসহ) ১৭ গৰাকীলৈ বৃদ্ধি কৰিলে।