অবিৰত হত্যালীলা; পুনৰ সন্ত্ৰাসবাদীৰ আক্ৰমণৰ বলি দুই শ্ৰমিক, ১১লৈ বাঢ়িল মৃতক

ডিজিটেল ডেস্ক : দেশৰ সামৰিক বাহিনীয়ে সৰ্বশক্তিৰে অৱতীৰ্ণ হৈছে সন্ত্ৰাসবাদ দমনত। চলি আছে তীব্ৰ অভিযান। কিন্তু অদমনীয় সন্ত্ৰাসবাদী। পাকিস্তানৰ অদৃশ্য সহযোগ আৰু সমৰ্থনত জম্মু-কাশ্মীৰত অব্যাহত আছে সন্ত্ৰাসবাদীৰ হত্যালীলা। সামৰিক বাহিনীৰে তুমুল সঘৰ্ষৰ সমান্তৰালকৈ সন্ত্ৰাসবাদীয়ে আক্ৰমণ কৰি গৈছে সাধাৰণ নাগৰিকৰ ওপৰতো। আজি পুনৰ দুজন সাধাৰণ নাগৰিকক গুলীয়াই হত্যা কৰে সন্ত্ৰাসবাদীয়ে।

দেওবাৰে দুজন অকাশ্মীৰী শ্ৰমিকক গুলীয়াই হত্যা কৰে সন্ত্ৰাসবাদীৰ দলে। ইয়াকে লৈ এনে বৰ্বৰ আক্ৰমণত নিহতৰ সংখ্যা বৃদ্ধি পালে ১১জনলৈ। কুলগামৰ ৱানপোহত কিছুসংখ্যক শ্ৰমিকৰ ওপৰত নিৰ্বিচাৰ আক্ৰমণ চলায় সন্ত্ৰাসবাদীয়ে। এই আক্ৰমণত আন এজন শ্ৰমিক আহতও হয়। এজন বিহাৰী ফুচকা বিক্ৰেতা আৰু এজন উত্তৰপ্ৰদেশৰ মিস্ত্ৰীক গুলীয়াই হত্যা কৰাৰ এদিনৰ পাছতে পুনৰ সংঘটিত হ’ল সাধাৰণ নাগৰিকৰ ওপৰত আক্ৰমণৰ এই ঘটনা।

কালি অৰবিন্দ কুমাৰ শ্বাহক শ্ৰীনগৰত আৰু ছাগিৰ আহমেদক পুলৱামাত গুলীয়াই হত্যা কৰিছিল সন্ত্ৰাসবাদীয়ে। সাধাৰণ নাগৰিকৰ ওপৰত সন্ত্ৰাসবাদীৰ এই বৰ্বৰ আক্ৰমণে কাশ্মীৰ উপত্যকাত আতংকৰ সৃষ্টি কৰিছে। ইফালে, সন্ত্ৰাসবাদীৰে সংঘৰ্ষত এতিয়ালৈ ৯সেনা শ্বহীদ হ’বলগীয়া হৈছে।