বিমান যাত্ৰীৰ বাবে সুখবৰ, আজিৰে পৰা ১০০ শতাংশ যাত্ৰীৰে চলিব ঘৰুৱা বিমান

ডিজিটেল ডেস্কঃ আজিৰে পৰা অৰ্থাৎ ১৮ অক্টোবৰৰ পৰা ১০০ শতাংশ যাত্ৰীৰে চলিব সকলো ঘৰুৱা বিমান। অসামৰিক বিমান পৰিবহণ মন্ত্ৰালয়ে আজিৰে পৰা ঘৰুৱা বিমানসমূহ ১০০ শতাংশ যাত্ৰীৰে চলাচলৰ অনুমতি প্ৰদান কৰিছে৷ ভাৰতত ক'ৰ'না ভাইৰাছৰ আক্ৰান্তৰ সংখ্যা ক্ৰমাৎ হ্ৰাস পোৱাৰ পিছতে কেন্দ্ৰীয় চৰকাৰে বিমানসমূহৰ ক্ষেত্ৰত থকা প্ৰতিবন্ধকতা উঠাই লোৱাৰ সিদ্ধান্ত গ্ৰহণ কৰিছে। আজিৰে পৰা সম্পূৰ্ণ ক্ষমতাৰ সৈতে বিমানসমূহ চলাচল কৰিব।

অসামৰিক বিমান পৰিবহণ মন্ত্ৰালয়ে সদৰী কৰা অনুসৰি ১৮ অক্টোবৰৰ পৰা ঘৰুৱা বিমান উৰণত যাত্ৰীসকলৰ প্ৰতি লগোৱা নিষেধাজ্ঞাসমূহ উঠাই লোৱা হৈছে। কেন্দ্ৰীয় চৰকাৰে যাত্ৰীসকলক সম্পূৰ্ণ ক'ভিড প্ৰট'কল পালন কৰিবলৈ আহ্বান জনাইছে। উল্লেখ্য যে আজিৰে পৰা ১০০ শতাংশ যাত্ৰীৰে ঘৰুৱা বিমান চলা বাবে সুখী হৈ উঠিছে যাত্ৰী আৰু ঘৰুৱা বিমানৰ কৰ্তৃপক্ষ। কেন্দ্ৰীয় চৰকাৰে ২০২১ চনৰ ছেপ্টেম্বৰ মাহত ঘৰুৱা বিমানৰ যাত্ৰীৰ ক্ষমতা ৭২.৫ শতাংশৰ পৰা ৮৫ শতাংশলৈ বৃদ্ধি কৰিছিল। ইয়াৰ পূৰ্বে অসামৰিক বিমান পৰিবহণ মন্ত্ৰালয়ে জুলাই মাহত ঘৰুৱা বিমানৰ ক্ষমতা ৫০ শতাংশৰ পৰা ৬০ শতাংশলৈ বৃদ্ধি কৰিছিল।