ডিজিটেল ডেস্কঃ পোহৰলৈ আহিছে এক হৃদয় বিদাৰক কাণ্ড, য’ত এজন পিতৃয়ে নিজৰ ৬ বছৰীয়া পুত্ৰৰ ওজন কমাবলৈ ঘণ্টাৰ পাছত ঘণ্টা ট্ৰেড মিলত দৌৰাই ৰাখিছিল। বহু সময়ত শিশুটি ট্ৰেড মিলৰ পৰা পৰিও গৈছিল। ইয়াৰ পিছতো দেউতাকে তেওঁক ট্ৰেড মিলত দৌৰিবলৈ বাধ্য কৰাই থাকিল। কেইবাবাৰো ট্ৰেড মিলৰ পৰা পৰি শিশুটিৰ হৃদযন্ত্ৰ আৰু যকৃত গুৰুতৰভাৱে আঘাতপ্ৰাপ্ত হয়। ইয়াৰ উপৰিও উশাহ-নিশাহৰ হাৰো নিয়ন্ত্ৰণহীন হৈ থাকিল। পিছত এই কাৰণতে শিশুটিৰ কৰুণ মৃত্যু হয়। আমেৰিকাত ঘটিছে এই কৰুণ ঘটনা।
এই চাঞ্চল্যকৰ কাণ্ডৰ ভিডিঅ পোহৰলৈ আহিছে। শিশুটিৰ পিতৃ ৩১ বছৰীয়া ক্রিষ্টোফাৰ গ্ৰেগৰে নিজৰ ৬ বছৰীয়া পুত্র ক’ৰি মিচিঅ’লোক ট্ৰেডমিলত দৌৰিবলৈ বাধ্য কৰা দেখা গৈছে৷ অভিযুক্ত পিতৃ আমেৰিকাৰ নিউ জাৰ্চিৰ বাসিন্দা। পুত্ৰক ফিট কৰি ৰখাৰ বাবে তেওঁ জোৰকৈ ট্ৰেড মিলত দৌৰিবলৈ দিছিল। শিশুটি ভাগৰি পৰিলেও জোৰ কৰি দৌৰি থাকিবলৈ বাধ্য কৰিছিল। পুত্ৰই দৌৰি থাকোতে পিতৃয়ে ট্ৰেড মিল মেচিনৰ গতি বৃদ্ধি কৰাও দেখা গৈছে।
ভিডিঅ’টোত দেখা গৈছে যে শিশুটি ট্ৰেড মিলৰ পৰা পিছলি পৰি যোৱাৰ পিছতো পিতৃয়ে তেওঁৰ লগত বেয়া আচৰণ কৰা দেখা যায়। এই ঘটনা ২০২১ চনৰ বুলি জানিব পৰা গৈছে। এই গোচৰৰ বিচাৰৰ বাবে মঙলবাৰে আদালতত হাজিৰ কৰা হয় পিতৃক। এই সময়ছোৱাত আদালতৰ কক্ষত অভিযুক্ত পিতৃৰ ভিডিঅ’ও বজাইছিল, য’ত তেওঁ নিজৰ পুত্ৰক ট্ৰেড মিলত দৌৰিবলৈ বাধ্য কৰাইছে। ৬ বছৰীয়া নিৰীহ শিশুৰ ওপৰত জোৰ-জবৰদস্তি কৰা দেখা গৈছে। এই ঘটনাৰ ভিডিঅ’টো আমেৰিকাত কলিন ৰাগ নামৰ এজন ব্যক্তিয়েও এক্সত শ্বেয়াৰ কৰিছে। আইনী বিশেষজ্ঞৰ মতে এই ঘটনাত দোষী সাব্যস্ত হ’লে অভিযুক্ত পিতৃয়ে যাৱজ্জীৱন কাৰাদণ্ডৰ সন্মুখীন হ’ব লাগিব।
Continue Reading
