ডিজিটেল ডেস্কঃ যিসকলে ওজন হ্ৰাস কৰিব বিচাৰে তেওঁলোকৰ বাবে দিল্লীৰ এগৰাকী আৰক্ষী বিষয়া আদৰ্শ হ’ব পাৰে। দিল্লী আৰক্ষীৰ ডিচিপি জিতেন্দ্ৰ মণিক দেহৰ ওজন হ্ৰাস কৰাৰ বাবে আৰক্ষী আয়ুক্ত সঞ্জয় অৰোৰাই পুৰস্কৃত কৰিছে। আগতে জিতেন্দ্ৰ মণি শকত শৰীৰ আৰু বিশাল আকাৰৰ বাবে পৰিচিত আছিল যদিও এতিয়া তেওঁক চিনি পোৱাটো টান হৈ পৰিছে।
দৰাচলতে দিল্লী আৰক্ষীৰ ডিচিপি জিতেন্দ্ৰ মণিয়ে মেট্ৰ’ ডিচিপিৰ দায়িত্ব গ্ৰহণ কৰিছে। কিছুদিনৰ আগতে জিতেন্দ্ৰ মণিৰ ওজন প্ৰায় ১৩০ কেজি আছিল। নিজৰ এই ওজনক লৈ সুখী নাছিল জিতেন্দ্ৰ মণি। অশেষ কষ্ট কৰি জিতেন্দ্ৰ মণিয়ে ১৩০ কেজিৰ পৰা কমালে ৪৬ কেজি ওজন। বৰ্তমান জিতেন্দ্ৰ মণিৰ ওজন ৮৪ কেজি। ১৩০ কেজি ওজন হোৱাৰ সময়ত তেওঁ বহু স্বাস্থ্যজনিত সমস্যাৰ সন্মুখীন হ’বলগীয়া হৈছিল। ডায়েবেটিছ, উচ্চ ৰক্তচাপ, কলেষ্টেৰল বৃদ্ধি আদি ৰোগে তেওঁক আগুৰি ধৰিছিল। তেওঁ অনুভৱ কৰিছিল যে শকত হোৱাটো ভাল নহয়।
ইয়াৰ পিছত তেওঁ নিজৰ জীৱন সলনি কৰাৰ সিদ্ধান্ত লয় আৰু জীৱনশৈলীত এক ডাঙৰ পৰিৱৰ্তন আনিলে। প্ৰথমতে তেওঁ ১৫ হাজাৰ খোজ খোজ কাঢ়ি আৰু স্বাস্থ্যসন্মত খাদ্য গ্ৰহণ কৰা আৰম্ভ কৰিছিল। তেওঁৰ খাদ্যৰ বিষয়ে তথ্য দি তেওঁ কয় যে মই উচ্চ মাত্ৰাৰ কাৰ্বহাইড্ৰেট থকা ৰুটি আৰু ভাত সলনি কৰিলোঁ আৰু চুপ, চালাড আৰু ফলৰ দৰে পুষ্টিকৰ খাদ্যৰ ওপৰত গুৰুত্ব দিলোঁ।
এনে কঠোৰ খাদ্যাভ্যাস পালন কৰি তেওঁ মাত্ৰ ৮ মাহতে কঁকালৰ ১২ ইঞ্চি হ্ৰাস কৰিলে আৰু লগতে কলেষ্টেৰলৰ মাত্ৰাও নিয়ন্ত্ৰণ কৰিলে। তেওঁ কয় যে নিজক পৰিৱৰ্তনৰ কথা ভাবিলেই প্ৰতিমাহে ৪.৫ লাখ খোজ খোজ কাঢ়ি যোৱাৰ লক্ষ্য ৰাখিছিলো। যোৱা ৮ মাহত মই ৩২ লাখতকৈও অধিক খোজ খোজ কাঢ়িছো।
ডিচিপি জিতেন্দ্ৰ মণিয়ে কয় যে মোৰ স্বাস্থ্যৰ অকল্পনীয় উন্নতি দেখি আমাৰ চি পি ছাৰে মোৰ স্বাস্থ্যৰ উন্নতিৰ সংকল্প আৰু ইয়াক বাস্তৱত পৰিণত কৰাৰ প্ৰচেষ্টাৰ বাবে ডাঙৰ মঞ্চৰ পৰাই মোক প্ৰশংসা কৰিছিল। এই অনুষ্ঠানত দিল্লী আৰক্ষীৰ সকলো শীৰ্ষ পৰ্যায়ৰ বিষয়া আৰু হাজাৰ হাজাৰ জোৱান উপস্থিত থাকে। আজি মোৰ কঁকালৰ আকাৰ ৪৬ৰ পৰা ৩৪লৈ হ্ৰাস পাইছে। আকৌ আৰক্ষীৰ ইউনিফৰ্ম আৰু অন্যান্য কাপোৰ আকাৰ অনুসৰি কিনিব লগা হ’ল। মই সকলোকে ক'ব বিচাৰো যে ''জীৱনক লৈ ইতিবাচক হওক, সাৱধান হওক আৰু বহুত খোজ কাঢ়ক।''
Continue Reading
