ডিজিটেল ডেস্কঃ ওড়িষ্যাত প্ৰকৃতিয়ে বিধ্বংসী ৰূপ ধাৰণ কৰিছে।শনিবাৰে ওড়িষ্যাৰ ছখন জিলাত একাধিক বজ্ৰপাতৰ ফলত ৯ জন লোকৰ মৃত্যু হয়। বৰ্তমান এই অঞ্চলত ধাৰাসাৰ বৰষুণ দি আছে।ক্ষতিগ্ৰস্ত জিলা কেইখনৰ ভিতৰত ময়ুৰভঞ্জ, ভদ্ৰক, কেন্দ্ৰপাৰা, গঞ্জাম, কেওনঝাৰ আৰু ধেংকনাল আদি উল্লেখযোগ্য।এই ঘটনাত ৯ জন লোকৰ মৃত্যু হোৱাৰ লগতে ২০ জনতকৈ অধিক লোক আহত হৈছে। ৰাজ্যৰ মুখ্যমন্ত্ৰী মোহন চৰণ মাঝিয়ে এই ঘটনাক লৈ শোক প্ৰকাশ কৰে ৷
ময়ুৰভঞ্জত বৈশিঙা আৰক্ষী থানাৰ অন্তৰ্গত চিংগাৰাপাৰা গাঁৱত নিজৰ পথাৰত কৰ্মৰত এহাল দম্পতীৰ দেহত বজ্ৰপাত পৰি থিতাতে নিহত হয়। ভদ্ৰকত আগৰপাডা থানাৰ অন্তৰ্গত সাহুপাদা গাঁৱত বজ্ৰপাতৰ ফলত অমৰ ছেঠীৰ মৃত্যু হোৱাৰ বিপৰীতে আন এজন ব্যক্তি গুৰুতৰভাৱে আহত হয়।
আনহাতে কেওনঝাৰ জিলাত তেলকোই ব্লকৰ অন্তৰ্গত গুডিকানছা গাঁৱত বজ্ৰপাতৰ ফলত দুগৰাকী মহিলা আৰু এটি শিশু গুৰুতৰভাৱে আহত হয়। বৰগড় জিলাত বৰপালী ব্লকৰ অন্তৰ্গত মুনুপালী গাঁৱত বজ্ৰপাতৰ ফলত আহত হয় ১২ জনৰো অধিক লোক।
মুখ্যমন্ত্ৰী মোহন মাঝিয়ে এই ঘটনাক লৈ শোক প্ৰকাশ কৰাৰ লগতে শোকগ্ৰস্ত পৰিয়ালবৰ্গলৈ সমবেদনা জ্ঞাপন কৰিছে। প্ৰাণ হেৰুৱা প্ৰতিজন ব্যক্তিৰ পৰিয়াললৈ ৪ লাখ টকা ক্ষতিপূৰণ দিয়াৰ কথা ঘোষণা কৰি আটাইকেইজন আহত লোকৰ চিকিৎসাৰ খৰচ চৰকাৰে বহন কৰিব বুলি আশ্বাস দিয়ে।
Continue Reading
