ডিজিটেল ডেস্কঃ কলকাতাৰ আৰ জি কৰ হাস্পতালত এগৰাকী চিকিৎসকক ধৰ্ষণ আৰু হত্যা কৰা ঘটনাই সমগ্ৰ দেশ কঁপাই তুলিছে। এই নাৰকীয় কাণ্ডৰ ন্যায় বিচাৰি দেশৰ প্ৰান্তে প্ৰান্তে চলিছে প্ৰতিবাদ।
চিকিৎসকগৰাকীৰ ন্যায় বিচাৰি ৰাজ্য চৰকাৰৰ অনুদান ঘূৰাই দিলে কলকাতাৰ বহু কেইখন পূজা সমিতিয়ে। পূজা সমিতিসমূহৰ এই সিদ্ধান্তক সকলোৱে শলাগ লৈছে।
চিকিৎসকগৰাকীৰ ধৰ্ষণ আৰু হত্যাৰ ন্যায় বিচাৰি ৰাজপথত প্ৰতিবাদৰ ধুমুহাৰ সৃষ্টি হৈছে। ইখনৰ পাছত সিখন পূজা সমিতিয়ে দুৰ্গা পূজাৰ বাবে আগবঢ়োৱা চৰকাৰী অনুদান ঘূৰাই দিবলৈ আৰম্ভ কৰিছে।
শেহতীয়াকৈ উত্তৰপাৰাত শক্তি সংঘৰ পিছত এইবাৰ হাইলেণ্ড পাৰ্ক উৎসৱ সমিতিয়ে ঘূৰাই দিলে চৰকাৰী অনুদান। নাৰীৰ সুৰক্ষা সুনিশ্চিত কৰিবলৈ আৰু চিকিৎসকগৰাকীৰ ন্যায় বিচাৰি দুৰ্গা পূজাৰ বাবে দিয়া চৰকাৰী অনুদান নাকচ কৰে কমিটীসমূহে।
এই পৰিপ্ৰেক্ষিতত চিপিএমৰ ৰাজ্যিক সম্পাদক মহম্মদ চেলিমে কয়, ‘‘মই পূজা সমিতিৰ সিদ্ধান্তক সমৰ্থন কৰিছোঁ। সকলোৱে এইদৰে প্ৰতিবাদ কৰিছে। আৰু ডেৰ মাহৰ পাছত দুৰ্গা পূজা হ'ব। তাৰ আগতে ছোৱালীজনীৰ কৰুণ ভাগ্যক কেন্দ্ৰ কৰি সকলো শ্ৰেণীৰ লোকে যি প্ৰতিবাদ সাব্যস্ত কৰিছে সেয়া আদৰণীয়।‘‘
Continue Reading
