অসমৰ ১ ইঞ্চি ভূমিও এৰি দিয়া নহ’বঃ ড০ হিমন্ত বিশ্ব শৰ্মা

শিলচৰ: শিলচৰৰ ‘আৱৰ্ত ভৱন’ত অসম-মিজোৰাম সীমান্তৰ সংঘাতৰ সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাই সংবাদমেলৰ আয়োজন কৰে৷ সংবাদমেলখনত মুখ্যমন্ত্ৰীগৰাকীয়ে গুৰুত্বপূৰ্ণ মন্তব্য দাঙি ধৰে৷ ছেটেলাইটযোগে নিৰীক্ষণ কৰা হ’ব সীমান্ত৷ সীমান্তৰ স্থিতাৱস্থা বাহাল ৰখাত গুৰুত্বপ্ৰদান কৰিছে অসম চৰকাৰে৷ মিজোৰাম চৰকাৰে প্ৰতিশ্ৰুতি ভংগ কৰাৰ অভিযোগ উত্থাপন কৰিছে অসমৰ মুখ্যমন্ত্ৰীগৰাকীয়ে৷

পূৰ্ব পৰিকল্পিত আছিল মিজো আৰক্ষীৰ আক্ৰমণ বুলিও সাংবাদকিৰ সন্মুখত ব্যক্ত কৰে তেওঁ৷ আধাঘণ্টা ধৰি চলাইছিল ধাৰাসাৰ গুলীবৰ্ষণ৷ আৰক্ষী অধীক্ষক, আৰক্ষীৰ উপ-মহাপৰিদৰ্শকৰ বৈঠকৰ সময়তে চলাইছিল গুলীবৰ্ষণ বুলিও শৰ্মাই মন্তব্য আগবঢ়ায়৷ লগতে সংবাদেমেলত তেওঁ কয় যে, ‘কালি মিজোৰামৰ মুখ্যমন্ত্ৰীৰ সৈতে ৬ বাৰ কথা পাতিছিলো৷ দুয়োজন মুখ্যমন্ত্ৰীৰ সৈতে কথা পাতিছিল অমিত শ্বাহেও৷'

আনহাতে, ড০ শৰ্মাই কয় যে, 'অসমৰ ১ ইঞ্চি ভূমিও এৰি দিয়া নহ’ব মিজোক’৷ এতিয়াও মিজোৰামে কেন্দ্ৰীয় চৰকাৰৰ নিৰ্দেশ মনা নাই বুলিও গুৰুত্বৰ অভিযোগ উত্থাপন কৰিছে মুখ্যমন্ত্ৰীগৰাকীয়ে৷ মিজো আৰক্ষীয়ে ব্যৱহাৰ কৰিছিল ‘লাইট মেচিনগান'৷ নিহত জোৱানৰ পৰিয়াললৈ ৫০ লাখকৈ আৰু আহত প্ৰতিজনলৈ ১লাখ টকাৰ সাহায্য পৰ্দান কৰা হ’ব বুলিও শৰ্মাই সংবাদমেলত সদৰী কৰে৷ নিহতসকলৰ পৰিয়ালক চৰকাৰী চাকৰি প্ৰদানৰো আশ্বাস মুখ্যমন্ত্ৰী ড০ হিমন্ত বিশ্ব শৰ্মাৰ৷