ডিজিটেল ডেস্ক: ২২ জানুৱাৰীত প্ৰাণ প্ৰতিষ্ঠা হ’ব ৰামলালাৰ৷ প্ৰাণ প্ৰতিষ্ঠাৰ পূৰ্বে অযোধ্যাত চলিছে ব্যাপক প্ৰস্তুতি৷ আজিৰে পৰা আৰম্ভ হৈছে প্ৰাণ প্ৰতিষ্ঠাৰ বিভিন্ন পৰ্ব৷
২১ জানুৱাৰীলৈ চলিব প্ৰাণ প্ৰতিষ্ঠাৰ পৰ্ব৷ ৰাম জনমভূমি তীৰ্থক্ষেত্ৰই আৰম্ভ কৰিলে প্ৰতিষ্ঠাৰ পৰ্ব৷ আজি সৰযু নদীৰ তীৰত পালন কৰা হ’ল বিভিন্ন ৰীতি-নীতি৷ দহবিধি স্নান, বিষ্ণু পূজা, গো–মাতা পূজন কৰা হ’ল সৰযু নদীৰ পাৰত৷ ১৭ জানুৱাৰীত ৰামলালাৰ মূৰ্তি লৈ অযোধ্যাত কৰা হ’ব ধৰ্মীয় শোভাযাত্ৰা৷
সৰযু নদীৰ পানী কঢ়িয়াই অনা হ’ব ৰাম মন্দিৰলৈ৷ ১৮ জানুৱাৰীত অনুষ্ঠিত হ’ব গণেশ অম্বিকা পূজা, বৰুণ পূজা, মাতৃকা পূজা, ব্ৰাহ্মীণবৰণ, বাস্তু পূজা৷ পৱিত্ৰ অগ্নি প্ৰজ্জ্বলন হ’ব ১৯ জানুৱাৰীত৷ আনহাতে, ২০ জানুৱাৰীত সৰযু নদীৰ পানীৰে পৰিষ্কাৰ কৰা হ’ব মন্দিৰ৷ ২১ জানুৱাৰীত স্নান কৰোৱা হ’ব ৰামলালাৰ মূৰ্তি৷
১২৫টা পাত্ৰৰ জলেৰে স্নান কৰোৱা হ’ব ৰামলালাৰ মূৰ্তি৷ ২২ জানুৱাৰীত প্ৰাণ প্ৰতিষ্ঠা হ’ব ৰামলালাৰ মূৰ্তিৰ৷ ২১ জানুৱাৰীত দৰ্শনাৰ্থীৰ বাবে বন্ধ থাকিব মন্দিৰ৷ ২২ জানুৱাৰীত দৰ্শনাৰ্থীৰ বাবে পুনৰ খোলা হ’ব মন্দিৰৰ দুৱাৰ৷ ২২ জানুৱাৰীৰ ১২.২০ মিনিটত প্ৰাণ প্ৰতিষ্ঠা কৰা হ’ব৷
৭ হাজাৰ লোক উপস্থিত থাকিব প্ৰাণ প্ৰতিষ্ঠা অনুষ্ঠানত৷ শচীন তেণ্ডুলকাৰ, বিৰাট কোহলী, অমিতাভ বচ্চনকে ধৰি দেশৰ মহাতাৰকাসকলক নিমন্ত্ৰণ জনোৱা হৈছে অনুষ্ঠানলৈ৷ ১০০খন চাৰ্টাৰ্ড বিমানেৰে অযোধ্যাত উপস্থিত হ’ব VIP, VVIP৷ প্ৰধানমন্ত্ৰী নৰেন্দ্ৰ মোদীৰ উপস্থিতিত হ’ব প্ৰাণ প্ৰতিষ্ঠা৷ ইতিমধ্যে, অযোধ্যাত গঢ়ি তোলা হৈছে কটকটীয়া নিৰাপত্তা ব্যৱস্থা৷
Continue Reading
