ডিজিটেল ডেস্কঃ পশ্চিম মালীত শনিবাৰে অবৈধভাৱে খনন কার্য চলোৱা এটা সোণৰ খনি খহি যোৱাৰ বাবে কমেও ৪৮গৰাকী লোকৰ মৃত্যু হয়। দেশখনৰ চৰকাৰী কর্তৃপক্ষ আৰু স্থানীয় সূত্রসমূহে সদৰী কৰা অনুসৰি, অবৈধ সোণৰ খনিটো ভূমিস্খলন হৈ খহি যোৱাৰ ফলত আজি ৪৮গৰাকী লোকৰ মৃত্যু হয় আৰু এই মৃত্যুৰ সংখ্যাকে লৈ এতিয়ালৈকে অবৈধ সোণৰ খনিত ভূমিস্খলন হৈ মুঠ ১৮০০ লোকৰ মৃত্যু হৈছে।
উল্লেখযোগ্য যে আফ্রিকাৰ সোণ উৎপাদনকাৰী অগ্রণী দেশসমূহৰ ভিতৰত মালীও অন্যতম আৰু দেশখনৰ সোণৰ খনিসমূহত মাৰাত্মক ভূমিস্খলন আৰু দুর্ঘটনাসমূহ প্রায়ে হৈ থাকে। দেশখনত চলি থকা সোণৰ অবৈধ খনিবোৰক লেকাম লগাবলৈ চৰকাৰে চেষ্টা চলাই থাকিও ব্যর্থ হৈছে। শনিবাৰৰ দুর্ঘটনাটোৰ বিষয়ে আৰক্ষীয়ে কয় যে দুর্ঘটনাটোৰ কিছুমান ভুক্তভোগী পানীত পৰি যায় আৰু ইয়াৰ ভিতৰত এগৰাকী মহিলা আৰু তেওঁৰ শিশুটোও আছে।
সূত্রসমূহে কয় যে চীনৰ এটা কোম্পানীয়ে পূর্বতে খননকার্য চলোৱা এটা পৰিত্যক্ত খনিত শনিবাৰে এই দুর্ঘটনাটো সংঘটিত হয়। বিগত জানুৱাৰীত দক্ষিণ মালীৰ এটা সোণৰ খনিত ভূমিস্খলন হৈ ১০জন লোকৰ মৃত্যু হৈছিল আৰু কেইবাজনো সন্ধানহীন হৈছিল। ঠিক এবছৰ পূর্বে, শনিবাৰে ভূমিস্খলন হোৱা একেটা অঞ্চলতে এটা সোণৰ খনিৰ সুৰংগ খহি যোৱাৰ ফলত ৭০গৰাকীতকৈ অধিক লোকৰ মৃত্যু হৈছিল।
উৎসঃ দৈনিক জনমভূমি
Continue Reading
