ষষ্ঠ দিনতো বন্যাৰ্তৰ সাৰথিৰ ৰূপত প্ৰাগ-জনমভূমি পৰিয়াল

ডিজিটেল ডেস্ক: বিগত দহদিন ধৰি বানপানীৰ সৈতে যুঁজি আছে শিৱসাগৰৰ হাজাৰ হাজাৰ মানুহ। কাৰোবাৰ ঘৰত এতিয়াও বুকুৰ সমান পানী, কোনোবাই বিদ্যালয়ৰ কোঠাত বা ওখ ৰাস্তাৰ কাষত আশ্রয় লৈ দিন কটাইছে। ভগা ঘৰ, নষ্ট হোৱা ধানৰ ভঁৰাল, উটি যোৱা সম্পদ আৰু অনিশ্চিত ভৱিষ্যতৰ চিন্তাই বহু পৰিয়ালৰ মুখৰ হাঁহি কাঢ়ি নিছে।

পেটৰ ভোক, শিশুৰ কান্দোন আৰু বৃদ্ধ-বৃদ্ধাৰ অসহায় দৃষ্টিয়ে বানৰ বিভীষিকাক আৰু অধিক বেদনাদায়ক কৰি তুলিছে। এনে এক সংকটৰ সময়ত সহায়ৰ হাত আগবঢ়াই বন্যার্ত লোকসকলৰ কাষত অবিৰতভাৱে থিয় দি আছে প্রাগ-জনমভূমি পৰিয়াল। 

সাহায্য অভিযানৰ ষষ্ঠ দিনত পৰিয়ালটোৱে পুনৰ দুটা পৃথক দলৰ দ্বাৰা জিলাখনৰ বিভিন্ন বানাক্রান্ত অঞ্চলত উপস্থিত হয়। তেওঁলোকৰ লগত কেৱল খাদ্য সামগ্রী নাছিল, আছিল সাহসৰ বাণী, সহমর্মিতাৰ স্পৰ্শ আৰু বিপদৰ সময়ত মানুহে মানুহৰ কাষত থকাৰ এক আন্তৰিক অংগীকাৰ। কালি এটা দলে নাজিৰা মহকুমাৰ বিহুবৰ অঞ্চলৰ চিলনী, প্ৰজা বস্তি আৰু চণ্টকৰ চেংধৰা গাঁৱত উপস্থিত হৈ বহু দুৰ্গত পৰিয়ালৰ হাতে হাতে খাদ্য সামগ্রী প্রদান কৰে। কেইবাজনো বৃদ্ধ-বৃদ্ধা আৰু মহিলাই সহায় লাভ কৰি আবেগ আপ্লুত হৈ পৰে। বহুদিন ধৰি অনিশ্চয়তাৰ মাজত কটাই থকা পৰিয়ালসমূহে সহায়ৰ এই হাতখনত নতুন আশাৰ সঞ্চাৰ অনুভৱ কৰে। 

আনহাতে, আনটো দলে শিৱসাগৰ মহকুমাৰ পানবেচা, মৰি দিলিহমুখ, গড়কোষ, লুৰুকী, তাঁতীপথাৰ আৰু বৰভেটি আদি অঞ্চলত উপস্থিত হৈ বানবিধ্বস্ত লোকসকলৰ মাজত খাদ্য সামগ্ৰী বিতৰণ কৰাৰ লগতে তেওঁলোকৰ দুখ-দুর্দশাৰ বুজ লয়। এতিয়াও বহু ঠাইত ঘৰ-বাৰী পানীৰ তলত আছে। বহুতত পানী কমিলেও জীৱন এতিয়াও স্বাভাৱিক হোৱা নাই। এনে সময়ত সহায়ৰ এই উপস্থিতিয়ে বহু দুর্গত লোকক মানসিকভাৱেও সাহস যোগায়। এই সাহায্য অভিযানত আটাছুৰ সভাপতি বসন্ত গগৈ আৰু তেওঁৰ সতীর্থসকলেও সক্রিয়ভাৱে সহযোগিতা আগবঢ়ায়। তেওঁলোকেও দুর্গত লোকসকলৰ সৈতে কথা পাতি প্রয়োজনীয় সহায় অব্যাহত ৰখাৰ আশ্বাস দিয়ে। এই সাহায্য বিতৰণ কাৰ্যসূচীত প্রাগ-জনমভূমি পৰিয়ালৰ হৈ ৰেৱ কুমাৰ বৰা, উৎপল বৰা, মনজিৎ কাশ্যপ, ৰুবুল গগৈ, উত্তম শইকীয়া, দেৱজিত নন্দন, ৰাজু ৰাজখোৱা, বিশ্ব সৰকাৰ, ৰিদিপ বৰা, আব্দুল মান্নাফ আদিয়ে অংশগ্ৰহণ কৰে। 

উল্লেখযোগ্য যে প্রাকৃতিক দুর্যোগে হয়তো বহু মানুহৰ সপোন উটুৱাই নিয়ে, কিন্তু মানুহৰ প্ৰতি মানুহৰ মমতা কেতিয়াও উটুৱাই নিব নোৱাৰে। শিৱসাগৰৰ এই দুৰ্যোগৰ সময়ত প্রাগ-জনমভূমি পৰিয়াল আৰু বিভিন্ন স্বেচ্ছাসেৱী সংগঠনৰ এই নিৰৱচ্ছিন্ন মানৱীয় প্রচেষ্টাই সেই সত্যক পুনৰ এবাৰ প্ৰতিষ্ঠা কৰিলে। উৎস: দৈনিক জনমভূমি