১৩ মাৰ্চত কোকৰাঝাৰলৈ আহিব দেশৰ প্ৰধানমন্ত্ৰী নৰেন্দ্ৰ মোদী

ডিজিটেল ডেস্ক: বিধানসভা নিৰ্বাচনৰ পূৰ্বে বিটিচিৰ সদৰ কোকৰাঝাৰ চহৰৰ বডোফা নগৰস্থিত গ্ৰীণফিল্ডত অনুষ্ঠিত হ’বলগীয়া এখন বিশাল জনসভাত অংশ গ্ৰহণ কৰিব প্ৰধান মন্ত্ৰী নৰেন্দ্ৰ মোদীয়ে৷

সিদিনাই বহু প্ৰত্যাশিত কোকৰাঝাৰ-গেলেফু সংগী ৰে’লপথ নিৰ্মাণৰ শিলান্যাসৰ সম্ভাৱনা৷ লগতে ৰাজ্য আৰু কেন্দ্ৰ চৰকাৰৰ বহুকেইটা নতুন প্ৰকল্পৰ শুভাৰম্ভণি আৰু শিলান্যাস প্ৰধানমন্ত্ৰী নৰেন্দ্ৰ মোদীয়ে কোকৰাঝাৰৰ পৰাই কৰিব ৷

প্ৰধানমন্ত্ৰীৰ কোকৰাঝাৰ ভ্ৰমণৰ পূৰ্বে প্ৰস্তুতিৰ লগতে আন আনুষংগিক দিশসমূহৰ বিষয়ে বুজ লোৱাৰ উদ্দেশ্যৰে সোমবাৰে কোকৰাঝাৰৰ গ্ৰীণফিল্ডত উপস্থিত হয় ৰাজ্যৰ কেবিনেট মন্ত্ৰী জয়ন্ত মল্ল বৰুৱা, মুখ্য সচিৱ ড° ৰবি কোটা, বিটিচি প্ৰধান হাগ্ৰামা মহিলাৰী, বিটিচিৰ আইজিপি বিবেকৰাজ সিংসহ আন শীৰ্ষ বিষয়া ৷ 

আনহাতে গ্ৰীণ ফিল্ডৰ লগতে গ্ৰীণ ফিল্ডতে থকা হেলিপেড পৰিদৰ্শন কৰাৰ পিছত মন্ত্ৰী জয়ন্ত মল্ল বৰুৱা আৰু মুখ্য সচিব ড° ৰবি কোটাই বিটিচি সচিবালয়ত প্ৰধান মন্ত্ৰীৰ কোকৰাঝাৰ ভ্ৰমণক লৈ বিটিচি সচিবালয়ৰ কৰ্তৃপক্ষ আৰু শীৰ্ষ আৰক্ষী বিষয়াৰে এক বৈঠকত মিলিত হ’ব ৷

উল্লেখ্য যে প্ৰায় ডেৰৰ পৰা দুই লাখ লোকৰ সমাগম হ’বলগীয়া ১৩ মাৰ্চৰ বিশাল জনসভাত প্ৰধানমন্ত্ৰী নৰেন্দ্ৰ মোদীয়ে কেবাটাও অভিলাষী প্ৰকল্লৰ শুভাৰম্ভণি আৰু আধাৰশিলা স্থাপন কৰি একেদিনাই গুৱাহাটীৰ আন এখন কাৰ্যসূচীত অংশগ্ৰহণ কৰিব আৰু ১৪ মাৰ্চত শিলচৰৰ আন এখন বিশাল জনসভাত অংশ গ্ৰহণ কৰিব৷